Сыбайлас жемқорлық – әлемдегі мемлекеттерге ортақ аса қауіпті кесел. Сыбайлас жемқорлық елдің халықаралық беделіне нұқсан келтіреді, мемлекеттің саяси және қоғамдық институттары мен елдің әлеуметтік-экономикалық дамуын тежейді, мемлекеттік билік пен оның құқық қорғау органдарына деген сенімін төмендетеді.
Осы кеселмен күресу мақсатында елімізде «Сыбайлас жемқорлыққа қарсы іс-қимыл туралы» заң, көптеген мемлекеттік бағдарламалар қабылданды. Сыбайлас жемқорлыққа қарсы күрес мемлекеттік саясаттың басым бағыттарының бірі ретінде алдағы уақытта да қала бермек. Мемлекет басшысы Қасым-Жомарт Тоқаев жыл сайынғы Жолдауларында, келелі кеңестерде сыбайлас жемқорлықпен күресті ымырасыз жүргізу, жазаны қатаңдату туралы құзырлы құқық қорғау органдарына арнайы тапсырмалар беруде.
Шетелге заңсыз шығарылған активтер елге қайтарылып, әр түрлі әлеуметтік мәселелерді шешуге, инфрақұрылымдарды жаңғыртуға жұмсалуда.
Қазақстан Республикасының Қылмыстық кодексінде атап көрсетілгендей, барлық органдар мен лауазымды тұлғалар өз құзыреті шегінде сыбайлас жемқорлыққа қарсы күрес жүргізуге міндетті.
Бекмұхамет СЕРІКБАЕВ
