Жаз мезгілі келісімен халықтың табиғат аясына шығып, демалуға деген қызығушылығы артады. Әсіресе таулы аймақтарға саяхат жасап, көл жағасында тынығып, табиғаттың көркем көріністерін тамашалаушылардың қатары көбейеді. Алайда демалыс мәдениеті табиғатты қорғаумен қатар жүруі тиіс.
Өкінішке қарай, кейбір демалушылар барған орындарында қоқыс қалдырып, қоршаған ортаға зиян келтіріп жатады. Табиғат – баршаға ортақ байлық. Сондықтан әрбір азамат туған жердің тазалығына бейжай қарамай, қоқысты арнайы орындарға тастап, айналаны таза ұстауға атсалысуы қажет.
Панфилов ауданы табиғатының әсемдігімен ерекшеленетін өңірлердің бірі. Мұнда асқар таулар, мөлдір көлдер мен ерекше табиғи ландшафттар бар. Бұл көрікті жерлер аудан тұрғындары үшін ғана емес, еліміздің түкпір-түкпірінен келетін қонақтар үшін де тартымды демалыс орындары саналады. Осындай табиғи байлығымызды сақтау – баршамыздың ортақ міндетіміз.
Бүгінде елімізде жүзеге асырылып жатқан «Таза Қазақстан» акциясы қоршаған ортаны қорғауға, экологиялық мәдениетті қалыптастыруға бағытталған маңызды бастама болып отыр. Аталған акцияға белсенді қатысып, табиғатты таза ұстауға әркім өз үлесін қоса алады. Бұл үшін үлкен іс атқарудың қажеті жоқ – қоқыс тастамау, айналаны таза ұстау және өзгелерге үлгі көрсету жеткілікті.
Еліміздің де, жеріміздің де тазалығы – өз қолымызда. Табиғатты аялау арқылы біз келер ұрпаққа таза әрі көркем Қазақстанды аманаттаймыз. Сондықтан аудан тұрғындары мен қонақтарын «Таза Қазақстан» акциясын қолдап, көрікті жерлеріміздің тазалығын сақтауға шақырамыз.
Бекмұхамет СЕРІКБАЕВ
