25 қазан – Республика күні мерекесін жазиралы Жаркент өңірінің тұрғындары да үлкен дүрмекпен, риясыз шаттық, қуанышпен атап өтті. Қазақстан халқының тәуелсіз ел атанған қастерлі күніне орай орталық алаңда түрлі іс-шаралар ұйымдастырылып, ауыл шаруашылық жәрмеңкесі, этно-мәдени орталықтардың ас мәзірінен жарыс, «Лағман пати» сынды бәсекелер ұйымдастырылып, Үшарал ауылында аудандық марафон өткізілді.
Ал 25 қазан күні таңертеңгі сағат 9-да Жаркент қаласының орталық Жібек жолы даңғылындағы №34 көп қабатты үйіне жылу беретін блокты модульді қазандығы тұрғындарының қатысуымен салтанатты жағдайда пайдалануға берілді. Бұдан кейін аудандық мәдениет үйінде мерекеге байланысты салтанатты шара ұйымдастырлды. Залға әскери қызметкерлер көтерген ел туы енгізіліп, Қазақстанның ән ұранымен басталған салтанатты шарада аудан әкімі Марат Сағымбек мырза мерекеге байланысты баяндама жасады. Өңір басшысы баяндамасында халыққа қайта оралған Республика күні мерекесінің мәні мен маңызын терең талдап өтіп, өңірде жүзеге асқан бірқатар әлеуметік, экономикалық жетістіктерді саралап, алда атқарылатын қомақты құрылыс жұмыстарына тоқталды. Президент Қасым-Жомарт Тоқаев жақында Жетісу облысына келген сапарында қазақтың Қастееві атанған ұлы суретші өмірге келген өңірде ел берекесіне есе беретін бірқатар халықаралық нысандардың жұмысын бұрынғыдан да жандандыруды атап өткенін тілге тиек етті. Аудан әкімі салтанатты сәтте бірқатар еңбек ардагерлеріне, ұжым озаттарына мемлекеттік және мерекелік наградаларын тапсырды. Жиын соңы аудан өнерпездарының мерекелік концертіне ұласты.
Мерекелік іс-шара аудан әкімдігі үйінің алдындағы кең алаңда жалғасты. Мұнда өңірдегі этно мәдениет орталықтары, аудан мектептері мен мекемелер сурет, қолөнер, ұлттық тағам көрмелерін қойып, мерекеге жиналған қауым өнерлерін тамашалады. Осы алаңның бас жағына Қоңырөлең ауылдық округі қазақтың киіз үйін тігіп, оның ішінде ұлттық тағамдарымыз бен қолөнер бұйымдарының көрмесін орналастырып, ауыл өнерпаздары киіз үй маңында домбырамен ән шырқап, көпшілікті думанға бөледі.
Республика күні мерекесінде Жаркент қаласында тағы бір игілігі мол «Баркөрнеу» саябағының ашылу салтанаты өткізілді. Қаланың шығыс шетіне салынып, бірер жыл бұрын пайдалануға берілген жекеменшік «Көк базар» сауда орталығының алдына орналасқан сейіл-серуен алаңы өңір халқының демалыс уақытын көңілді өткізуіне ыңғайланып жасалған екен. Бұл алаңды «Көк базар» сауда орталығының қожайыны, табысты кәсіпкер Мақсат Сейітбек жасатыпты. Саябақтың ашылу салтанатына аудан әкімі Марат Сағымбек қатысып, қалаға көрік беріп тұрған жаңа демалыс орынын салған кәсіпкерге алғыс айтты.
5350 шаршы метр аумақты алып жатқан сауда нысанында қазірдің өзінде ірі электроника дүкені, сауда орталықтары жұмыс істеуде. Жаңадан пайдалануға берілген сыртқы саябақтың аумағы 4000 шаршы метр. Айналасы толықтай абаттандырылып, тұрғындардың демалуына және балаларды қыдыртуға, жастардың бос уақытын тиімді өткізуге арнайы жасалған. 280 млн теңгеге жасалған орталықтың басшысы Мақсат Көбелеков алдағы уақытта бұл аумақта қосымша 100 адам жұмыспен қамтылады дейді.
«Қазірдің өзінде бұл жерде бірнеше ірі орталықтармен жұмыс істеп жатырмыз. Оларда 100-ге жуық жұмысшылар бар. Біз қосымша сауда нүктелерін ашып, жастардың уақытын тиімді пайдалануына жағдай жасаймыз. Ол үшін қазіргі екінші қабаттағы бос орындарға үстел теннисі басқа да орындар ашуды жоспарлап отырмыз», – деді орталық басшысы.
Нысанның ашылуында Алматыдан арнайы театр ұжымы келіп тұрғындарға мерекелік көңіл күй сыйлады. Жасөспірімдер арасында ұлттық спорттан түрлі жарыстар өткізіліп, қаржылай сыйлықтар табысталды.
Мерекелік шара барысында ережесіз жекпе-жектен үш дүркін әлем чемпионы Ардақ Назаров жаркентіктерді қуаныштарымен құттықтап сөз сөйлеп, облыстың Құрметті азаматы, ардагер ұстаз, ақын Әдепхан Төреханұлы ақ батасын берді.
Осындай халыққа көтеріңкі көңіл-күй сыйлайтын іс-шаралар өңірдің барлық ауылдық округтерінде өткізілді. Көктал ауылдық округінде «Көктал-Агро» ЖШС көп балалы ана Мунира Сламжановаға 4 бөлмелі үйдің кілтін тапсырды.
Аталған серіктестік бұған дейін де көп балалы және аз қамтылған отбасыларға түрлі бағытта қайырымдылық жасап келген. Бұл жолы 6 жарым млн теңгеге үй алып берген ферма басшысы Жәнібек Оханов тағы да қайырымдылық жұмыстарын жалғастыратынын жеткізді.
«Бұйырса алдағы уақытта тағы да көп балалы отбасыларға баспана кілтін тапсыруды жоспарлап отырмыз. Сіздерді бүгінгі мерекемен құттықтаймын», – деді ол.
Бұған дейін жеті баласымен пәтер жалдап жүрген Мунира баспана алып берген азаматтарға алғысын білдірді.
«Шынымды айтсам сене алар емеспін. Балаларым әлі кішкентай. Көшуде қиналатынбыз. Енді өз үйіміз бар. Өте қуаныштымын. Жақсы мерекеде қуаныш сыйлаған ағаларға алғысымды айтамын», – деді көп балалы ана.
Бүгінде Панфилов ауданы бойынша 5 мыңға жуық отбасы баспана кезегінде тұр. Қазір өңірде көп пәтерлі 320 үйдің құрылысы қызу жүрілуде.
Осылайша Республика күні мерекесі жазиралы Жаркент өңірінде жалпыхалықтық сипатта тойланды.
Мырзағали НҰРСЕЙІТ,
Нұрбол ХАНАҒАТ,
Панфилов ауданы.
