25 қазан – Республика күніне орай 74261 әскери бөлімі Н.Головацкий атындағы орта мектептің 9 сынып оқушыларымен «Республикам менің» атты тақырыпта «Ерлік сабағын» өткізді. Бұл сабақтың мақсаты мектеп оқушыларын туған елін, жерін, халқын ардақтай білуге үйрету. Бақытқа жетер даңғыл жол туған жерді, елді, Отанды сүюден басталатынын түсіндіру. Оқушылардың бойындағы патриоттық сезімдерін ояту.
«Ерлік сабағына» республикалық «Желтоқсан ақиқаты» ҚБ Панфилов аудандық филиалының төрағасы М.Смағұлов, ұйым мүшелері – С.Ноғаев, Ұ.Болатбеков, Қ.Ибрайымжанов және Тәжік-Ауған қақтығысында бітімгерлік міндетін атқарушылар ұжымының төрағасы Ғ.Айтымбетов пен әскери қызмет ардагерлері Т.Бекжанов, А.Якупов мырзалар қатысты.
Ретімен сөз алған ардагерлер негізінен жас ұрпақ санасына туған халқына деген құрмет пен сүйіспеншілікті, ұлттық рух қасиеттерін осы мектеп қабырғасынан алып, елім, жерім деген ниетте қанаттанып өсуі керектігіне баса назар аударды. Сондай-ақ, осы бала кезден-ақ ана тілі мен дінін, ділін, оның тарихы мен ұлттық салт-дәстр, әдет-ғұрыптарды, мәдени мұраларды қастерлеп, қасиет тұтуға шақырды. Кездесу барысында Тәуелсіздіктің алғашқы қарлығашы «Желтоқсан-86 көтерілісі», Тәжік-Ауған қақтығысында болған уақиғалар мен әскери қызметтің қыр-сырлары жайында патриоттық рухтағы біршама естеліктер айтылып, мысалдар келтірілді.
Осынау игі тілектерге қосылған 74261 әскери бөлімінің «Тәрбие және идеологиялық жұмыстар жөніндегі» орынбасары МУА майор А.Асқаров пен кадрлар қызметінің бастығы майор Р.Қыдырбеков те оқушыларға әскери сала бойынша көптеген мағлұматтар беріп, Отанды қорғау әр қазақ азаматының қасиетті борышы екендігі туралы нақтылап айтып өтті.
Ардагерлер мен әскери қызметшілер, оқушылар арасында сұрақ-жауап алмасқан «Ерлік сабағы» өте сәтті өтті. Шәкірттер де белсенділік танытып, Отан, Желтоқсан көтерілісі, патриоттық сезім туралы көкейлерінде жүрген сұрақтарымен бөлісті. Сабақ соңы елімізде мәңгі тыныштық болсын, Отанымыз Қазақстан мәңгі жасай берсін деген жалынды сөздер мен жүрекжарды тілектермен аяқталды.
У.А. ТУРГАМБАЕВА,
ҚРҚК қызметкері, 74261 әскери бөлімнің ТжИЖ
жөніндегі бөлім басшысының әскери
қызметшілердің отбасымен жұмыс
ұйымдастыру жөніндегі көмекшісі.
