Жетісу облысында шағын көлемді кемелер белсенді пайдаланылатын екі ірі су айдыны орналасқан — Алакөл және Балқаш көлдері. Көліктік бақылау инспекциясының мәліметінше, бүгінде облыста ресми түрде шамамен 225 шағын көлемді кеме тіркелген. Оның ішінде 120 қайық, 70 гидроцикл және 35 паром бар. Шілде айының басталуымен аталған техникаларды тексеру, кеме жүргізушілерінің құжаттарын бақылау және құқық бұзушылықтардың алдын алу жұмыстарымен ТЖД инспекторлары айналысады.
Тексеру барысында суға шығудың заңдылығына ерекше назар аударылады. Тіркелмеген немесе техникалық байқаудан өтпеген шағын көлемді кемелерді пайдалануға жіберу, сондай-ақ басқару құқығы жоқ адамдарды кеме жүргізуге жіберу лауазымды тұлғалар мен шағын кәсіпкерлік субъектілері үшін 10 АЕК мөлшерінде айыппұл салуға әкеп соғады. Орта кәсіпкерлік субъектілері үшін айыппұл мөлшері 20 АЕК болса, ірі бизнес субъектілері үшін 50 АЕК көлемінде айыппұл қарастырылған.
Ішкі су жолдарында жүзу қағидаларын бұзу, оның ішінде белгіленген жылдамдықты арттыру, навигациялық белгілер талаптарын сақтамау, маневр жасау тәртібін бұзу немесе тыйым салынған жерлерде тоқтау жағдайларында 2 АЕК мөлшерінде айыппұл көзделген. Ал су көлігін пайдалану қағидаларының өзге де ұсақ бұзушылықтары үшін 1 АЕК көлемінде айыппұл салынады.
Жетісу облысының Төтенше жағдайлар департаменті шағын көлемді кеме иелерін жүзу құралдарының техникалық жағдайын алдын ала тексеруге, оларды толық көлемде құтқару құралдарымен жабдықтауға және қажетті құжаттарын жаңартуға шақырады. Бұл өңірдегі су айдындарында жазғы маусымның қауіпсіз өтуіне ықпал етеді.
