Мемлекет басшысы Қасым-Жомарт Тоқаев туризм саласын ел экономикасының басым бағыттарының бірі ретінде айқындап, оны жүйелі дамыту жөнінде нақты міндеттер қойған болатын. Осы тапсырма аясында өңірлерде туристік әлеуетті арттыруға бағытталған жұмыстар қарқын алып келеді.
Табиғаты таңғажайып Панфилов ауданы да туристерді қызықтыратын ерекше мекендердің қатарына жатады. Аспанмен астасқан қарлы шыңдары, мөлдір өзендері мен жасыл желек жамылған жайлаулары бұл өлкенің басты байлығы саналады. Қай қонақ келсе де Жаркент өңірінің көркем табиғатына тәнті болып, ерекше әсермен аттанады.
Соңғы жылдары ауданның туристік әлеуетін дамыту бағытында жүйелі жұмыстар атқарылуда. Солардың бірі – табиғаты тұмса күйінде сақталған «Сарытау» жайлауының Жетісу облысындағы жаңа туристік аймақтардың қатарына енуі. Бұл өңірдің туристік тартымдылығын арттырып қана қоймай, аудан экономикасының дамуына да тың серпін бермек.
Осыған орай Visit Zhetysu туристік ақпараттық орталығы еліміздің әр өңірінен бұқаралық ақпарат құралдарының өкілдері мен танымал блогерлерді арнайы шақырып, Сарытау өңірінің мүмкіндіктерімен таныстырды.
Ақпарат өкілдері Үсек өзенінің мөлдір суын, ну орманды алқаптарды, ерекше жартасты табиғи ландшафтарды аралап көріп, өңірдің қайталанбас сұлулығына жоғары баға берді. Сонымен қатар олар Жазиралы Жаркент халқының қонақжайлығы мен ақжарқын көңілін ерекше атап өтті.
Іс-шара аясында «Жаркент-Арасан» сауықтыру кешенінде БАҚ өкілдерімен кездесу ұйымдастырылып, ауданның туристік әлеуеті мен саланы дамыту бағытындағы алдағы жоспарлар талқыланды. Кездесу барысында қатысушылар алған әсерлерімен бөлісіп, өңірдің туристік мүмкіндіктеріне қатысты пікірлерін білдірді.
Жиында Жетісу облысы әкімінің орынбасары Марлен Қапашұлы Көлбаев өңірдің табиғи байлығы мен тарихи-мәдени нысандары ішкі және халықаралық туризмді дамытуға толық мүмкіндік беретінін атап өтті. Оның айтуынша, алдағы уақытта туристік инфрақұрылымды жетілдіру, жаңа бағыттар ашу және өңірді кеңінен насихаттау бойынша ауқымды жұмыстар жалғасады.
Сарытау жайлауының жаңа туристік аймақ ретінде танылуы – Панфилов ауданының туристік әлеуетін арттырудағы маңызды қадам. Бұл бастама өңірге келетін қонақтар санын көбейтіп қана қоймай, жергілікті кәсіпкерліктің дамуына, жаңа жұмыс орындарының ашылуына және аудан экономикасының өркендеуіне оң ықпал етпек. Жетісудың інжу-маржаны саналатын Сарытау алдағы уақытта еліміздің ең танымал туристік бағыттарының біріне айналары сөзсіз.
