Аудан әкімі Марат Рахымбердіұлы Сағымбек өңірде жүзеге асырылып жатқан әлеуметтік маңызы бар құрылыс нысандарын аралап, атқарылып жатқан жұмыстардың барысымен танысты. Жұмыс сапасы, құрылыс қарқыны және нысандарды белгіленген мерзімде пайдалануға беру мәселелері басты назарға алынды.
Алдымен аудан басшысы Сүптай ауылында салынып жатқан 120 орындық жаңа мектептің құрылыс алаңына барды. Қазіргі таңда білім беру нысанында ішкі әрлеу және инженерлік жұмыстар жүргізілуде. Нысанды аралау барысында ішкі жөндеу жұмыстарының сапасына қатысты бірқатар кемшіліктер анықталды.
Аудан әкімі мердігер мекеме өкілдеріне анықталған олқылықтарды қысқа мерзімде толықтай жоюды қатаң тапсырды. Құрылыс жұмыстарының сапасы талапқа сай болуы қажеттігін айтып, жауапты тұлғаларға нақты мерзім белгілеп, кемшіліктерді қалпына келтіру бойынша тиісті ескертулер жасады.
Жаңа мектепті биылғы оқу жылы басталғанға дейін пайдалануға беру жоспарланып отыр. Осыған байланысты жаз мезгілін тиімді пайдаланып, құрылыс жұмыстарын толық аяқтау, мектеп аумағын абаттандыру, көгалдандыру және сыртқы инфрақұрылымды жобаға сәйкес ретке келтіру міндеті қойылды. Сонымен қатар жауапты бөлім басшылары мен болашақ мектеп әкімшілігіне құрылыс барысын тұрақты бақылауда ұстап, күнделікті мониторинг жүргізу тапсырылды.
Жұмыс сапары барысында аудан әкімі Сүптай ауылында жеке инвесторлардың қолдауымен салынып жатқан тұрғын үйлердің құрылысымен де танысты. Қазіргі таңда мұнда 20 тұрғын үйдің құрылысы жүргізілуде. Оның ішінде 10 үйдің құрылысы толық аяқталып, пайдалануға беруге дайын.
Бұл баспаналар көпбалалы отбасылар мен әлеуметтік жағынан осал санаттағы азаматтарды тұрғын үймен қамтамасыз ету мақсатында салынуда. Заманауи талаптарға сай жобаланған үйлер кең әрі жайлы, барлық қажетті инженерлік инфрақұрылыммен қамтамасыз етілген.
Аудан басшысы тұрғындарды баспанамен қамту Панфилов ауданындағы әлеуметтік саясаттың маңызды бағыттарының бірі екенін атап өтті. Оның айтуынша, бүгінде ауданның көптеген ауылдарында осындай тұрғын үйлер бой көтеруде. Соңғы жылдары аудан көлемінде 200-ден астам тұрғын үй салынып, олар кезең-кезеңімен тұрғын үй кезегінде тұрған азаматтарға табысталып келеді. Бұл бағыттағы жұмыстар алдағы уақытта да жүйелі түрде жалғасын табады.
Сонымен қатар жұмыс сапары аясында аудан әкімі Жаркент қаласындағы көпқабатты тұрғын үйлердің қасбеттерін жаңарту жұмыстарының барысын да көрді. Қазіргі таңда жөндеу жұмыстары аяқталуға жақын. Ғимараттардың сыртқы келбетін жаңарту қала сәулетін жақсартып қана қоймай, тұрғындарға қолайлы әрі көрікті орта қалыптастыруға мүмкіндік береді.
Жалпы, Панфилов ауданында әлеуметтік нысандардың құрылысы, тұрғын үй салу және елді мекендердің инфрақұрылымын жаңғырту жұмыстары жоспарлы түрде жалғасуда. Аудан басшылығы барлық жобаның сапалы әрі белгіленген мерзімде аяқталуын тұрақты бақылауда ұстап, тұрғындардың өмір сүру сапасын арттыруға бағытталған бастамаларды кезең-кезеңімен жүзеге асыруда.
