Жетісу өңірінің туристік әлеуетін арттыру мақсатында Алакөл көлінің жағалауында ауқымды жұмыстар жүргізілуде. Жазғы демалыс маусымында саяхатшылар үшін қолайлы орта қалыптастыру және санитарлық тазалықты сақтау басты назарда, – деп хабарлайды 7-su.kz ақпараттық порталы.
Аймақтағы Ақши және Көктұма ауылдарының жағалауларын күтіп ұстаумен арнайы «Алакөл Тазалық» коммуналдық кәсіпорны айналысады. Кәсіпорын 50-ге жуық қызметкер мен 20-дан астам техниканы пайдалана отырып, аумақтың тазалығын тұрақты түрде қамтамасыз етеді. Демалушыларға жайлы болуы үшін жағажайға 720 қоқыс контейнері, 45 биодәретхана және 44 киім ауыстыратын кабина орнатылды.
Қауіпсіздік мәселесіне де ерекше көңіл бөлінген. Су айдынындағы тәртіпті қадағалау мақсатында 14 құтқарушы мен 11 моторлы қайық кезекшілік атқарады. Сондай-ақ жағалау бойында 40 құтқару мұнарасы бой көтеріп, 13 шақырымға буй сызықтары тартылды. Қоғамдық тәртіпті нығайту үшін 50 полиция қызметкері, 16 автокөлік және 5 ұшқышсыз дрон тартылған.
Бұдан бөлек, 39 бейнебақылау камерасы арқылы жағалау аумағы тәулік бойы бақылауда. Бұл камералар полицияның Жедел басқару орталығына тікелей қосылған. Нәтижесінде рұқсат етілмеген орындарға көлік қою немесе қоқыс тастау сынды заңсыз әрекеттер дереу анықталып, құқық бұзушылар жауапкершілікке тартылады.
Соңғы үш жыл ішінде өңірде іргелі инфрақұрылымдық жобалар іске асты. Атап айтқанда:
Үшарал әуежайының ұшу-қону жолағы жаңғыртылып, темір жол және әуе рейстері тұрақты ұйымдастырылды.
57 шақырым электр желісі тартылып, екі қосалқы станса іске қосылды, бұл энергия тапшылығын жойды.
Тәулігіне 6,5 мың текше метр су тазартатын кәріз тазарту қондырғысының құрылысы жалғасуда.
Жағалауды бекіту жобасы аясында 14 шақырымға жуық аумақ нығайтылуда.
Демалушылар өз кезегінде жағажайдың тазалығы мен жаңадан орнатылған нысандарға оң бағасын беріп, жыл сайынғы сапалық өзгерістерді қуана атап өтуде. Бұл шаралар Алакөл көлін отбасылық демалыс үшін ең ыңғайлы әрі қауіпсіз орындардың біріне айналдыруға бағытталған.
