Абай күні биылғы сайлауалды науқанына мәдени мұра мен қоғамдық бірегейлікті қалыптастыратын құндылықтар тақырыбын қосты. Ұлы ақынның рухани мұрасын ұлықтаған шаралармен қатар, партиялар ел өңірлерін аралап, тұрғындармен және еңбек ұжымдарымен кездесулер өткізді. Жүздесулерде халықты толғандырған әлеуметтік мәселелерден бастап, өндірісті дамыту, инфрақұрылымды жаңғырту, экологиялық қауіпсіздік және еңбек жағдайларына дейінгі мәселелер көтерілді.
«Әділет» партиясының республикалық сайлауалды штабының басшысы Айбек Дәдебай бастаған топ Абай облысына барып, өңір тұрғындарымен кездесті. Сапар Семей қаласындағы Абай Құнанбайұлының ескерткішіне гүл шоқтарын қоюдан басталды. Бұл қадам сайлауалды науқанның саяси мәселелермен ғана шектелмей, елдің тарихи-мәдени мұрасына деген құрметпен де сабақтас екенін көрсетті.
Тұрғындармен кездесуде партия кандидаттары тұрғын үйдің қолжетімділігін арттыру, жеңілдетілген ипотекалық несиелеуді дамыту, медициналық көмектің сапасын көтеру, азық-түлік импортына тәуелділікті азайту және қазақстандықтарды жасанды интеллект технологияларымен жұмыс істеуге даярлау мәселелерін ортаға салды.
Ал облыс тұрғындары өңірдегі өзекті мәселелерді алға тартты. Атап айтқанда, Семейдегі жылу және су құбырлары желілерінің тозуы, Семей ядролық полигонындағы сынақтардан зардап шеккен азаматтарды әлеуметтік қорғау, ғылымды дамыту және инфрақұрылымды жаңғырту қажеттігі сөз болды. Кездесу соңында партияның жаңа мүшелеріне партиялық билеттер табысталды.
Сайлауалды науқан аясында Жалпыұлттық социал-демократиялық партия да қоғамдық мәселелерге назар аударды. Астанада «Гендерлік теңдік – шынайы демократия» атты республикалық сайлауалды форум өтті. Оған партиядан Құрылтай депутаттығына кандидаттар, гендерлік саясат саласындағы сарапшылар, үкіметтік емес ұйымдардың өкілдері мен көпбалалы аналар қатысты.
Партия төрағасы Асхат Рахимжанов сайлау кезінде қолданылатын гендерлік квота мәселесіне тоқталып, ерлер мен әйелдердің еңбекақысындағы айырмашылық туралы айтты. Сондай-ақ тұрмыстық зорлық-зомбылыққа қарсы заңнамалық бастамалар мен «PANA» партиялық жобасы аясындағы жұмыстарды таныстырды.
«Байтақ» партиясы өз кезегінде сайлауалды күн тәртібінің экологиялық бағытын күшейтті. Өскеменде кандидат Алмаз Джакишевтің бастамасымен сенбілік ұйымдастырылып, Ертіс өзенінің жағалауы мен Куленовка су қорғау аймағынан 140 қап қоқыс жиналды.
Алакөл мемлекеттік табиғи қорығында табиғатты қорғау, биоалуантүрлілікті сақтау және экологиялық туризмді дамыту мәселелеріне арналған дөңгелек үстел өтті. Ақтөбе облысында кандидат Айман Сексенова Сарыжар ауылының тұрғындарымен кездессе, Маңғыстау облысында партия өкілдері «Қазақстан темір жолы» кәсіпорнының қызметкерлерімен жүздесті. Мұнда еңбек жағдайы, еңбекақы және медициналық қамтамасыз ету мәселелері талқыланды.
Қазақстан халық партиясы да сайлауалды жұмысты бірнеше бағытта жүргізді. Кандидаттар Әлімбек Ағибаев пен Евгений Миронов Теренкөл ауданының орталық аудандық ауруханасының ұжымымен кездесіп, медицина қызметкерлерінің еңбек жағдайы мен ауылдық жерлердегі медициналық көмектің қолжетімділігі туралы пікір алмасты.
Риддер қаласында партия өкілдері «Фирма Эталон» жол-құрылыс кәсіпорнының еңбек ұжымымен кездесті. Ал сайлауалды бағдарламаның 19 міндетіне арналған «Халықтық траверс» жобасы аясында қазақстандық альпинистер Іле Алатауындағы 19 шыңға көтерілді. Осылайша партия өз бағдарламасындағы міндеттерді символдық түрде тауға шығу идеясымен байланыстырды.
«Ауыл» партиясы Шығыс Қазақстан облысында жұмыс сапарын өткізіп, кәсіпорын өкілдерімен, экологтармен, үкіметтік емес ұйымдармен және ерекше қажеттіліктері бар балалардың ата-аналарымен кездесті. Кездесулер барысында инфрақұрылым, әлеуметтік сала, экологиялық қауіпсіздік және ауыл шаруашылығын дамыту мәселелері қозғалды.
Құрылтай депутаттығына кандидат Алмас Мұхаметов азық-түлік қауіпсіздігін қамтамасыз етудегі ғылымның рөліне арналған дөңгелек үстелге қатысып, аграрлық сектордың тұрақты дамуы үшін ғылыми әлеуетті тиімді пайдаланудың маңызын атап өтті.
«Ақ жол» партиясы да батыс және солтүстік өңірлердегі сайлауалды кездесулерін жалғастырды. Батыс Қазақстан облысының Қаратөбе ауданынан Астанаға велосипедпен келген мұғалім Асылбек Айболатов Ақтөбе, Қостанай және Ақмола облыстары арқылы жүріп өтті. Сапар барысында ол елді мекен тұрғындарымен кездесіп, олардың ұсыныстары мен өтініш-тілектерін жинады. Кейін бұл ұсыныстар партия басшылығына табысталды. Сапар қорытындысында Асылбек Айболатов партия қатарына қабылданды.
Маңғыстау облысында Бейнеу аудандық мәслихатының депутаты Райымбек Түзелов бастаған үгіт тобы Сарға ауылының тұрғындарымен кездесіп, өңір тұрғындарының ұсыныстарын тыңдады.
Ал «Respublica» партиясының Айдарбек Қожаназаров бастаған республикалық үгіт тобы Маңғыстау облысында кәсіпкерлік пен өндірісті дамытуға басымдық берді. Ақтауда кандидаттар OPTIMUM жобалау институтына, «WEST HIM TECHNOLOGY» ЖШС өндірістік цехына және Маңғыстау өңірлік электр желілік компаниясына барып, бизнесті қолдау мен отандық өндірісті дамыту мәселелерін талқылады.
Талдықорғанда партия штабы «Ажар» тігін фабрикасының қызметкерлерімен және «Алматинские краски» ЖШС жұмысшыларымен кездесті. Мұнда еңбекақы деңгейі, еңбек жағдайлары, импорттық шикізатқа тәуелділік және мемлекеттік сатып алуларға қатысу мүмкіндігі мәселелері сөз болды.
Бір күннің өзінде партиялардың сайлауалды науқанында көтерілген мәселелердің ауқымы кең екенін аңғаруға болады. Бірі мәдени мұра мен қоғамдық құндылықтарға, бірі әлеуметтік әділет пен гендерлік теңдікке, енді бірі экологияға, ауыл шаруашылығына, өндіріс пен еңбек мәселелеріне басымдық беріп отыр.
Бұл кездесулердің тағы бір ерекшелігі – партиялар өз бағдарламаларын тек мінберлерден жариялап қана қоймай, өңірлердегі тұрғындармен, дәрігерлермен, жұмысшылармен, кәсіпкерлермен, мұғалімдермен және азаматтық қоғам өкілдерімен тікелей талқылауға тырысуда. Яғни сайлауалды күн тәртібі партиялардың өз ұстанымдарымен қатар, жергілікті жерлерде көтерілген нақты мәселелермен де толықтырылып келеді.
Ал Абай күні осы күн тәртібіне ерекше рухани мазмұн қосты. Себебі ұлы ақынның мұрасы – білім, еңбек, әділет, жауапкершілік және адамдық қасиеттерді қатар қоятын тұтас құндылықтар жүйесі. Қоғамдық өмір мен саясаттағы өзгерістердің түпкі мақсаты да осы құндылықтарды күнделікті өмірде орнықтырумен өлшенбек.
