40 мың шақырымнан астам жол, 16 өңір және қарсыластарға жаңа үндеу – 15 және 16 тамыздағы сайлауалды науқан осындай көрсеткіштермен есте қалды. «Әділет» керуені экватор ұзындығынан да көп жол жүрді, ЖСДП «Ауыл» партиясына тікелей дебатқа шығуды ұсынды, ал басқа партиялар зауыттарда, егістік алқаптарында, клиникаларда, табиғи парктер мен IT алаңдарда сайлаушылармен байланыс орнатуды жалғастырды. Сайлауға бір апта қалғанда науқан өңірлерде ғана емес, қоғамдық-саяси кеңістікте де айқын көріне бастады.
«Әділет» партиясы Алматыда қаланың ғылыми және шығармашылық зиялы қауым өкілдерімен бірқатар кездесу өткізді. Ұлттық ғылым академиясында ғалымдар, жазушылар мен мәдениет қайраткерлері ғылымды дамыту және мәдени кодты сақтау мәселелерін талқылады. Farabi IT Hub алаңында IT қауымдастық өкілдерімен жеке кездесу өтіп, онда жасанды интеллектіні дамыту, технологиялық экспорт және отандық әзірлеушілерді қолдау мәселелері сөз болды. Сондай-ақ партия қазақстандық ғалымдардың Сиверс алмасының жаңа сұрыбын шығару бойынша жұмыс істеп жатқанын және оған «Әділет» атауын беру жоспарланғанын хабарлады.
«Әділетті Қазақстан үшін» партиясының мобильді керуені аралық қорытындысын жариялады: 23 күн ішінде қатысушылар 16 өңірді аралап, 40 мың шақырымнан астам жол жүрді. Бұл – экватор ұзындығынан да көп. Кестеге сәйкес, қалған күндері керуен Қостанай, Солтүстік Қазақстан және Павлодар облыстарындағы бағытын аяқтауы тиіс.
Жалпыұлттық социал-демократиялық партия Астанада мүлік иелері бірлестіктерінің (МИБ) қызметі және тұрғын үй-коммуналдық шаруашылық (ТКШ) мәселелері бойынша форум өткізді. Іс-шара барысында тұрғын үй қорын басқару және баспана иелерінің мүдделерін білдіру мәселелері талқыланды. Кандидат Талғат Тәтіков Ұлттық ТКШ палатасын құру туралы ұсыныс айтты. Сонымен қатар партия «Таза жағалау – таза су айдыны» экологиялық іс-шарасын өткізді. Оған қатысушылар су айдындарының бірінің жағалауын қоқыстан тазартып, ақпараттық тақтайшалар орнатты.
Партия төрағасы Асхат Рахымжанов «Ауыл» партиясының төрағасы Қайрат Айтуғановқа өкілдер мен делдалдардың қатысуынсыз, блогер Динара Сәтжанның алаңында тікелей дебат өткізуді ашық ұсынды. Бұған дейін аталған алаңда ЖСДП мен Қазақстан Халық партиясының көшбасшылары арасында пікірталас өткен болатын.
«Байтақ» партиясы «Табиғат – ұлттық мұра» атты сараптамалық дөңгелек үстелдің кезекті кезеңін өткізді. Бұл жолы іс-шара «Шарын» мемлекеттік ұлттық табиғи паркінің ұжымымен ұйымдастырылып, биоалуантүрлілікті сақтау, браконьерлікпен күрес және экотуризмді дамыту мәселелері талқыланды. Кандидат Владимир Мартель Ш. Шөкин атындағы Қапшағай ГЭС-інің ұжымымен кездесті. Шамамен 60 адам қатысқан жиында гидроэнергетиканы дамыту, су ресурстарын ұтымды пайдалану және жаңартылатын энергия көздерінің рөлі сөз болды. Кандидат Алма Қараш пластик қалдықтар мәселесін жүйелі түрде шешу қажеттігін талқылады. Оның айтуынша, микро және нанопластик адам ағзасының тіндерінен де табылып жатыр. Ал мемлекет пен бизнестің міндеті – жекелеген өндірушілер арасынан кінәлілерді іздеу емес, қалдықтарды қайта өңдеу жүйесін қалыптастыру.
Сондай-ақ партия Астана мен Өскемен қалаларындағы медицина және білім беру салаларының ұжымдарымен кездесу өткізді. Бұдан бөлек, Маңғыстау, Жамбыл және Алматы облыстарындағы ауыл тұрғындары арасында үгіт-насихат жұмыстарын жүргізді.
Қазақстан Халық партиясы бір күн бұрын ЖСДП төрағасымен өткен дебаттың қорытындысына қатысты пікір білдірді. ҚХП төрағасы Нұрсұлтан Шоқынов екі партияның жекелеген идеологиялық ұстанымдарының ұқсастығын атап өтіп, сонымен бірге ұйымдастырушылық жұмыс ауқымы мен жақтастарының саны бойынша айырмашылықтарға тоқталды. Ол ЖСДП-ның сайлауалды бағдарламасына жеке тоқталып, оның бірқатар тармағын іс жүзінде жүзеге асыру мүмкіндігіне күмән келтірді. Сондай-ақ Шоқынов Мәжілістің өткен шақырылымындағы ЖСДП фракциясының қызметіне тоқталып, өзінің мәліметінше, осы кезеңде фракция заң қабылдауға бастамашы болмағанын айтты.
«Ауыл» партиясы Шымкентте «Қазығұрт – Оңтүстік» кәсіпорнының еңбек ұжымымен кездесті. Партия төрағасы Қайрат Айтуғанов кандидаттармен бірге мұнай және логистика салаларының өкілдерімен теміржол тасымалының тиімділігін арттыру және инфрақұрылымды жаңғырту мәселелерін талқылады. Түркістан облысында Айтуғанов жергілікті диқандармен бейресми жағдайда – егістік алқабындағы түскі ас үстінде әңгімелесіп, олардың аграрлық секторды дамытуға қатысты мәселелерін тыңдады.
«Ақ жол» демократиялық партиясы Алматы, Қостанай, Қарағанды, Түркістан және Маңғыстау облыстарындағы кездесулерін жалғастырды. Партия төрағасы Дания Еспаева еліміздің әр өңірінен келген жекеменшік клиникалардың басшылары және дәрігерлермен кездесті. Қатысушылар лицензиялау, қаржыландыруға қол жеткізу және медициналық инфрақұрылымды дамыту мәселелерін талқылады. Кездесу қорытындысы бойынша партия Медициналық инвестициялық альянспен және Медициналық инвестициялық одақпен ынтымақтастық туралы меморандумға қол қойды.
«Respublica» партиясы Қостанай облысындағы қаланы және 14 ауданды электр энергиясымен қамтамасыз ететін «ЭПК-Форфайт» электр желілік компаниясына барды. Ұжыммен кездесу барысында отандық өндірісті дамыту, сондай-ақ өңірлердегі білім беру және медициналық қызметтердің қолжетімділігі мәселелері талқыланды. Бұдан бөлек, партия өкілдері 1974 жылдан бері жұмыс істейтін және өнімнің 300-ден астам түрін шығаратын «Баян Сұлу» кондитерлік фабрикасына барды.
Қостанайда жастармен ReTalks форматында бейресми кездесу және партияның ReWomen әйелдер қауымдастығының мерейтойлық 20-шы өңірлік форумы өтті. «Respublica» партиясының мәліметінше, аталған қауымдастық 22 мыңға жуық қатысушыны біріктіреді. Сонымен қатар партия Бурабай мен Көкшетаудың туристік орындарын аралауды қамтыған ReBus үгіт-насихат іс-шарасын өткізді.
Сайлауға бір апта қалғанда партиялар еңбек ұжымдарымен, бизнес және сарапшылар қауымдастығының өкілдерімен кездесулер өткізуді, сондай-ақ қоғамдық дебаттарға қатысуды жалғастырып жатыр. Соңғы күндері ҚХП мен ЖСДП өкілдері арасында дебат өтті. Бұдан бөлек, «Ауыл» партиясы қоғамдық пікірталас өткізуді ұсынды. Сонымен қатар партиялар өңірлердегі жұмысының ауқымын көрсетуді жалғастыруда. «Әділет» керуені өз бағытының экваторынан өтіп үлгерсе, басқа партиялардың штабтары еліміздің барлық дерлік өңірінде кездесулер өткізіп жатыр. Науқанның қорытынды аптасы бұдан да белсенді өтетін сыңайлы.
