Туған жердің тазалығы мен көркеюі – баршаға ортақ жауапкершілік. Бұл – бір күндік науқан емес, қоршаған ортаға деген мәдениетті қалыптастыратын, елді мекендердің ажарын арттыратын игі іс.
2026 жылғы 19 қыркүйекте Панфилов ауданында «Таза Қазақстан» жалпыұлттық экологиялық акциясы және World Cleanup Day халықаралық экологиялық акциясы аясында аудандық сенбілік ұйымдастырылды. Ауқымды тазалық шарасы барысында ауданның елді мекендерінде санитарлық тазалық жұмыстары жүргізілді. Көшелер, аулалар мен қоғамдық орындар қоқыстан тазартылып, абаттандыру жұмыстары атқарылды. Сонымен қатар Жаркент қаласындағы Бөлек батыр саябағында және ауданның ауылдық елді мекендерінде ағаш көшеттерін отырғызу жұмыстары ұйымдастырылды. Тазалық пен көгалдандыру шараларына аудан тұрғындары, жастар, еріктілер, мекемелер мен ұйымдардың қызметкерлері белсенді қатысып, туған өлкенің тазалығы мен көркеюіне өз үлестерін қосты.
Бұл ретте «Таза Қазақстан» бастамасының мәні тек көшені тазалап, ағаш отырғызумен шектелмейтіні анық. Оның негізгі мақсаты – қоғамның экологиялық мәдениетін қалыптастыру, туған жерге деген жанашырлықты арттыру және ортақ іске жұмылу арқылы азаматтық жауапкершілікті күшейту. 19 қыркүйекте Мемлекет басшысы Қасым-Жомарт Тоқаев «Таза Қазақстан» экологиялық акциясы аясындағы іс-шарада сөйлеген сөзінде осы мәселеге ерекше тоқталды. Президент жастар мен еріктілердің табиғатты қорғау, туған жерді көркейту ісіне белсене араласуын атап өтіп, Отанға деген сүйіспеншілік ең алдымен адамның өз үйінен, өз ауылы мен қаласынан басталатынын айтты.
«Халқымызда «Бір тал кессең, он тал ек» деген сөз бар. Өнегелі сөз деп айтсақ, артық болмас. Табиғатты аялау, қоршаған ортаға қамқор көзбен қарау – ұлтымыздың болмысында бар асыл қасиет. Бұл – бабаларымыздың бізге қалдырған өсиеті әрі аманаты», – деді Мемлекет басшысы.
Шын мәнінде, атадан балаға жалғасқан осы ұстаным бүгінгі күні де өз мәнін жойған жоқ. Керісінше, елді мекендердің көркеюі, көшелердің таза болуы, жасыл желектің көбеюі – халықтың тұрмыс мәдениеті мен туған жерге деген көзқарасының көрінісі.
Президент «Таза Қазақстан» жобасының жай ғана ұран емес екенін атап өтіп, елдің тазалығы мен экологиялық мәдениеті өркениетті болашақпен тікелей байланысты екенін айтты. Оның сөзінше, тазалықты ең алдымен әр адам өзінен бастауы керек.
Бүгінде бұл бағытта еліміздің барлық өңірінде жүйелі жұмыстар жүргізілуде. Мемлекет басшысы келтірген мәлімет бойынша, жыл басынан бері Қазақстанда 600-ден астам экологиялық іс-шара өткізіліп, оған 7 миллион адам қатысқан. 130 мыңнан астам гектар жер тазартылып, 1,3 миллион тал егілген. Бұл – «Таза Қазақстан» бастамасының жалпыұлттық сипат алғанын көрсетеді. Алайда тазалық мәдениеті тек сенбілік кезінде ғана емес, күнделікті өмірде қалыптасуы тиіс. Қоқысты белгіленген орынға тастау, қоғамдық орындарды таза ұстау, табиғатты ластамау, ағаштарды күтіп-баптау – қарапайым көрінгенімен, үлкен жауапкершілікті қажет ететін азаматтық әдеттер.
Панфилов ауданындағы сенбілік те осындай ортақ жауапкершіліктің нақты көрінісі болды. Сенбілікке шыққан тұрғындардың бірі көшені тазаласа, енді бірі ағаш отырғызды. Мекеме қызметкерлері мен ауыл тұрғындары абаттандыру жұмыстарына атсалысып, жастар мен еріктілер қоршаған ортаны қорғау ісіне белсенділік танытты. Мұндай шараларға жастардың белсенді қатысуы олардың елге, жерге деген жанашырлығын арттырады. Президент те өз сөзінде осындай игі іске үлес қосып жүрген жастарды отаншыл азаматтар ретінде атап өтті.
«Таза Қазақстан» жобасының мақсаты – елімізді көркейту, жұртты ортақ іске жұмылдыру арқылы ынтымақ пен бірлікті күшейту. Сондықтан бұл бастама әр елді мекеннің, әр отбасының, әр азаматтың күнделікті өмір салтына айналғанда ғана өзінің толық мәнін аша түседі. Өйткені тазалық бар жерде тәртіп бар. Тәртіп бар жерде жауапкершілік бар. Ал жауапкершілік қалыптасқан ортада туған жерге деген сүйіспеншілік те нақты іспен көрінеді.
Панфилов ауданында өткен аудандық сенбілік – осы ортақ мақсат жолындағы тағы бір игі қадам. Таза көшелер, абаттанған аулалар, көгерген саябақтар мен жаңадан отырғызылған көшеттер – бүгінгі еңбектің ертеңгі нәтижесі. Өйткені бүгін егілген әрбір тал – келешекке қалдырылған көлеңке, тазартылған әрбір аумақ – ұрпаққа жасалған қамқорлық.
Таза аудан – таза орта – жарқын болашақ!
Молот СОЛТАНАЕВ
