Қоғамның тұрақтылығы мен мемлекеттің болашағы ең алдымен отбасы құндылықтарымен тығыз байланысты. Отбасы – адам өміріндегі алғашқы тәрбие мектебі, ал оның берік болуы тұтас қоғамның дамуына оң әсер етеді.
Жаңа Конституцияда отбасы, ана мен әке және бала мемлекеттің қорғауында екені айқындалған. Бұл – отбасының қоғамдағы ерекше орнын көрсететін маңызды конституциялық қағидаттардың бірі.
Балаға берілетін тәрбие ең алдымен отбасынан басталады. Үлкенге құрмет көрсету, кішіге қамқор болу, еңбекке жауапкершілікпен қарау, білімге ұмтылу және елге деген сүйіспеншілік сияқты қасиеттер күнделікті ортада қалыптасады.
Қазіргі қоғамда отбасының рөлі одан әрі арта түсуде. Ақпараттық технологиялардың кең таралуы, әлеуметтік желілердің ықпалы және өмір салтының өзгеруі ата-анадан бала тәрбиесіне бұрынғыдан да жауапкершілікпен қарауды талап етеді. Баланың қауіпсіздігі мен психологиялық жайлылығын қамтамасыз ету, оның білім алуына жағдай жасау – отбасының маңызды міндеттерінің бірі.
Мемлекет тарапынан да отбасы институтын қолдауға ерекше көңіл бөлінеді. Балалардың білім алуы, денсаулығын қорғау, әлеуметтік қолдау көрсету және отбасының әл-ауқатын арттыру бағытындағы шаралар қоғамның тұрақты дамуына ықпал етеді.
Отбасы құндылықтарының сақталуы тек ата-анаға қатысты мәселе емес. Бұл – бүкіл қоғамға ортақ жауапкершілік. Өйткені бүгінгі бала – ертеңгі азамат, ал оның бойындағы адамгершілік пен азаматтық қасиеттер елдің болашағына тікелей әсер етеді.
Конституцияда бекітілген адам құқықтары мен бостандықтарын құрметтеу де отбасындағы тәрбиеден басталады. Өз құқығын білетін, міндетін түсінетін және өзгелердің пікіріне құрметпен қарайтын азаматтың қалыптасуына отбасы мен қоғам бірлесе ықпал етеді.
Мықты отбасы – мықты қоғамның негізі. Ал өзара сыйластыққа, жауапкершілікке және сүйіспеншілікке құрылған отбасы құндылықтары ұрпақтан ұрпаққа жалғасқан жағдайда елдің әлеуметтік тұрақтылығы да нығая түседі.
Сондықтан отбасы институтын сақтау және нығайту – бүгінгі күннің ғана емес, келешек ұрпақ алдындағы маңызды міндет. Әр шаңырақтағы береке мен татулық елдегі тұрақтылық пен қоғамдық келісімнің берік негізіне айналады.
