Президент Жолдауында ішкі су ресурстарын үнемді пайдалану жөнінде маңызды мәселе көтерді. «Еліміздің кейбір өңірлерінде суды ең көп жұмсайтын ауыл шаруашылығы саласында оның 40 пайызы босқа ысырап болып жатыр. Су шаруашылығы нысандарының 60 пайызы тозып тұр. Олқылықтың орнын толтыру үшін өте батыл және шұғыл шаралар қажет»,-дегені тура біздің Жаркент өңірінің халқына арналған тұжырым сияқты.
Панфилов ауданында трансшекаралық Іле өзенін айтпағанда, Арқас тауынан жеті өзен өңірді көктеп өтеді.Байыптап байқасақ сол өзен суларының басым бөлігі пайдаға аспай Іле өзеніне құяды, кейбірі жол-жөнекей жер астына сіңіп, жан-жағына жайылып орынсыз шығынға ұшырайды.Осы өзендерді тежеп, ірі су қоймаларын жасаса егіншілеріміз жазда алқаптарын суаратын ылғалдан тарықпас еді.Оларда балық шаруашылықтарын құрып, су маржандарынан байлық көзін табуға да болады. Сонымен қатар осыдан жарты ғасыр бұрын салынған су жолдарының төзығы жеткені де рас. Түбі тесіліп, іргесі опырыла сынған темірбетон каналдар орынсыз су шығынының көзіне айналды. Су тапшы бола бастаған заманда осы каналдарды тыңғылықты жөндеп кәдеге жаратқан абзал.Жаңа Жолдауды тыңдап отырып мен осындай ойға келдім.
Кеңесбек Сералиев,
Панфилов ауданының Құрметті азаматы
