1990 жылы 25 қазанда Қазақстан Республикасының егемендігі туралы декларация қабылданды. Бұл – азаттық жолындағы алғашқы қадам болатын.
Белгілі жазушы, мемлекеттік сыйлықтың лауреаты, Панфилов ауданының Құрметті азаматы Бексұлтан Нұржекеұлының айтуынша, Республика күнінің маңызы зор. Ел болып атап өтер ұлық мереке.
«Тәуелсіздік, егемендік деген қасиетті ұғым. Бабаларымыз аңсап өткен, жете алмаған азаттық таңын біз көрдік. Осыған шүкір, тәуба. Қазақ халқы енді өзге елдермен терезесі тең, дамудың даңғыл жолына түсті. Біздің міндет пен парыз осы тәуелсіздік туын жығып алмай, тік ұстау. Саналары құлданбаған, болмыстары былғанбаған таза, адал, әділетсүйгіш, өр рухты жаңа ұрпақ тәрбиелеу. Және сол ұрпақтың қолына азаттық туын аманаттау. Бұл ретте еліміз дұрыс бағыт ұстануда. Мен кейінгі ұрпақтың білімділігіне, алғырлығына риза боламын. Дәстүр мен салтты құрметтеп, бабалар аманатын заманауи талаптармен байланыстырып, елімізді жаңа белеске көтереді деп сенемін. Сондықтан, егемендікті елге жариялаған – Республика күні құтты болсын!» – деді мемлекеттік сыйлықтың иегері.
