Ғылым мен технология ғасырында да сыбайлас жемқорлық әлем мемлекеттерінің өркениетті дамуына басты кедергі келтіретін қауіпті дерт ретінде қалып отырғаны ақиқат. Сондықтан халқының болашағының жарқын болуын ойлаған әрбір мемлекетте сыбайлас жемқорлықтың алдын алу шараларын қарастыру, оған қарсы мәдениетті қалыптастыру және оның тамырына балта шабу аса өзекті мәселеге айналып отыр.
Сыбайлас жемқорлық алдымен ұлттық қауіпсіздігімізге қатер төндіреді, елдің халықаралық беделіне нұқсан келтіреді және мемлекеттің эконономикалық әлеуетін төмендетеді. Сонымен бірге қоғамның елдің билігіне, оның құқық қорғау институттарына деген сеніміне селкеу түсіреді.
Қазақстан Республикасы егеменді ел болысымен ТМД мемлекеттерінің арасында алғашқылардың бірі болып «Сыбайлас жемқорлыққа қарсы іс-қимыл туралы» заңды, өзге де мемлекеттік бағдарламаларды қабылдады. Мемлекетіміз сыбайлас жемқорлықтың ауқымы мен салдарын алдын ала халықаралық озық тәжірибелерді негізге ала отырып бағалап, осы қауіпті қоғам дертімен ымырасыз күрес жүргізуді өзінің басты мемлекеттік стратегиялық басымдықтарының бірі ретінде белгілеген болатын.
Азаматтарымыздың бойында сыбайлас жемқорлыққа қарсы күрес жүргізу мәдениетін саналы түрде қалыптастырғанда ғана осы аса зиянды кеселге тегеурінді тосқауыл қойылатын болады. Тәжтажал сияқты қоғамның бар саласында белең алған сыбайлас жемқорлықпен күресте әрбір жеке тұлға белсенді азаматтық позиция ұстануларымен бірге бойында осы кеселге қарсы имунитет пен көзқарас қалыптастырулары керек. Қоғамымыздың әрбір мүшесі сыбайлас жемқорлықпен күрес жүргізуді тек құзырлы құқық қорғау немесе мемлекеттік органдардың ғана ісі деп түсінбегені абзал.
Қорыта айтқанда, әрбір азаматымыз жеке бас пайдасын емес, мемлекет мүддесі мен болашағын ойласа және бүкіл қоғам болып тығыз ынтымақтастықта күрес жүргізсек қана осы қауіпті дертті ауыздықтай аламыз. Сол себепті бүкіл қоғам болып өскелең ұрпақтың бойында бала жастан осы дертке деген төзбеушілік қағидаларын, отансүйгіштік қасиеттерді, имандылықты, әділдік пен еңбексүйгіштік қасиеттерді қалыптастыруымыз керек. Сонда ғана егемен еліміздің болашағы-жастарымыз сауатты, ұлтжанды һәм елжанды болса жемқорлықсыз Әділетті, Жаңа Қазақстанды қалыптастыратын боламыз.
Тельман ИБРАГИМОВ,
Жаркент қаласы әкімінің орынбасары
