Экономиканы әратараптандыру ісі біз сияқты дамушы елдерде үздіксіз жүргізіліп, уақыт өткен сайын жаңа реформалармен жаңғырылып отыруға тиісті. Бұл – экономикалық заңдылық. Тек шикізат пен жартылай өңделген өнімдерді экспортқа шығарып отыру қатаң нарықтық заңдылықтарға негізделген қоғамда ұзаққа төтеп бере алмайтынын уақыт өзі дәлелдеп берді.
Бүгінгі Үкіметтің кеңейтілген мәжілісінде Ел Президенті Қасым-Жомарт Тоқаевтың атқарушы билік тарапына салмақ сала сөйлеп, экономиканы әртараптандыру ісі бойынша нақты тапсырмалар беруі де алдағы болуы ықтыимал сын-қатерлерден ертерек сақтанудың жолы деп түсіндік.
«Жаңа дәуірдің сын-қатерлері аз емес. Оны еңсеру үшін бізге тиісті стратегия керек. Мен реформалардың нақты бағыты мен оны жүзеге асыру жолдары туралы осыған дейін де айттым. Үкімет ел экономикасын тұралап қалудан сақтап, орнықты дамуды қамтамасыз ету үшін күрделі шешімдер қабылдауы керек және ең бастысы сол шешімдерді іске асыруға тиіс. Бұл – жоғары білікті әрі жауапкершілік алуға дайын мемлекеттік қызметшілердің қолынан келетін жұмыс. Әлемдік тәжірибеге қарасақ, мемлекеттік аппараттың тиімділігі осындай күрделі кезеңдерде айқын көрінеді. Үкімет қаншалықты қиын болса да, жаппай үнемдеуге көшіп, бюджет қаржысын тек қана аса өзекті мәселелерді шешуге жұмсауы керек. Көрпеге қарай көсілетін уақыт келді. Орынсыз шығынды тоқтатып, аяғымызды тартып басу қажет», – деген Қасым-Жомарт Тоқаевтың сөзінде алға қойған міндеттерді жүзеге асыру үшін тұтас мемлекеттік аппарат тиімді жұмыс істеуі керек деген ой жатыр. Бұл ретте еліміздің қарапайым азаматтары да үкіметтің әрбір шешіміне түсіністікпен қарап, билік механизмдерінің дұрыс жұмыс істеуіне мүдделі болуы тиіс. Билігі пен халқының ынтымағы мен бірлігі жарасқан елдің ғана берекесі артып, ырысы толыға түсетінін әлемдік тәжірибе бізге көрсетіп отыр. Көрпеге қарап көсілу деген кері кету емес. Үнемдеген ұтатын заманға тап келдік. Не болса да қиын кезеңнен халықты қажытпай, экономикамызды шатқаяқтатпай алып шығу еліміздің әрбір азаматының парызы деп түсінем.
Бекмұхаммед СЕРІКБАЕВ,
«Жаркент айнасы» газетінің бөлім редакторы
