Мыңдаған жылдарды қамтитын тарихы бар Ұлы Жібек жолының қазақ жеріндегі көне сүрлеулерінің бірі жазиралы Жаркент өңірі біздің дәуірімізде жаңаша түр-сипатпен жаңғыруда. Ол ең әуелі халықаралық қарым-қатынасқа кең жол ашуымен ерекшеленіп, ежелден батыс пен шығысты жалғастырған бұл жолдың бойы бүгінде ғасыр құрылысы дерлік ірі-ірі индустриялық-инновациялық жобаларды жүзеге асыру алаңына айналды.
Мұнда қазір әлемде теңдесі жоқ «Қорғас шекара маңы халықаралық ынтымақтастық орталығы» күн сайын мыңдаған саяхатшылар келетін үлкен сауда алаңына айналды. Сонымен қатар «Жетіген – Қорғас» темір жол желісі тартылып, халықаралық «Алтынкөл», «Құндызды» бекеттері жасалып, «Нұр жолы» халықаралық өткізу бекеті халықаралық жүк айналымына кең жол ашты. Шекара түбінде теміржолшылар мен шекарашыларға арналған «Нұркент» кешенді қалашығы салынып, ол күн санап көркеюде.
Жылдар жемісіне айналған осынау мемлекеттік ірі құрылыстар қатары әлі де қалыңдай түсуде. Бүгінде АЭА (аранйы экономикалық аймақ) индустриялық орталығының аумағында оншақты өндіріс орындары әртүрлі өнімдер өндіріп, елімізде, алыс-жақын шет мемлекеттерге саудалауда. Болашақта мың гектар жерге Қазақстан мен ҚХР бірігіп технопарк жасап, онда отызға жуық өндіріс орыны салынады деген жоба бар. Сонымен қатар Оңтүстік Корей елі 200 гектар жер алып, өз автокөліктерін құрастырмақшы.
Солардың қатарында «Қорғас – Шығыс қақпасы» арнайы экономикалық аймағының құрамындағы «Khorgos Tech Сontract» ЖШС тігін компаниясы өткен жылдың наурыз айынан бастап төсек-орын бұйымдары мен терезе перделерін тігіп, Ресей сауда орындарына жөнелте бастады. Компания өз өнімдерін болашақта еліміздің ірі қалаларындағы сауда орындарына көтерме бағамен көптеп шығаруды көздеп отыр.
Тұрмыста сұранысы жоғары төсек-орын бұйымдары мен терезе перделері компанияға алғашқы сәттен толайым табыс әкелуде. Сондықтан тігін цехтарында өнім көлемін ұлғайта берудің мүмкіндіктері қарастырылуда. Жұмысын бастағанына аса көп уақыт болмаған кәсіпорын әкімшілігі өздеріне керек тігіншілер мен мамандарды Қорғасқа жақын елдімекендерден іздеуге мән беріп отыр. Қазір мұнда 30 тігінші еңбек етеді.
Арнайы экономикалық аймақтан бір гектарға жуық жер алған инвесторлар фабрика ғимараттарын салу мен құрал-жабдықтар алуға 187 миллион теңге жұмсапты. Өндірісті одан әрі өркендету бағытында компания басқа да қам-қарекеттер жасауда.
М. МАНАП
