Өкініштісі, жыл өткен сайын елімізде есірткі заттарын пайдаланушылар саны артып келе жатқанын нарколог дәрігерлер дабылдатып отыр. «Жаман әдет жұғымтал» демекші, денесіне есірткі егіп еліретіндер қарулы күштер қатарына да дендегені байқалады. Бұл дертпен қалай күресу керек? Оны жауынгерлер жолынан аластаудың амалы қайсы? Осы сауалдар төңірегенде Панфилов шекара басқармасының әскери құрамымен аудандық ауруханасының наркологі Дәурен Қойбағаровтың кездесуінде жан-жақты әңгіме қозғалды.
«Есірткіге тәуелділіктің алдын алу және жауынгерлерді жаман әдеттен сақтандыру» деген тақырыпта өткізілген шарада шекарашылар мен нарколог арасында ашық әңгіме өрбіді. Дәурен Сәбитұлы шекарашыларға қоғамдық дертке айналған есірткіге тәуелділік пен оның салдарына байланысты туындайтын мәселелерді жіпке тізгендей жіліктеп жеткізді. Нарколог кез келген есірткінің адам ағзасына тигізетін зияннын, оларды қолданушылардың қоғамдық орта мен заң алдында жауаптылығын тәптіштеп жеткізді.
– Әдетте алғашқы рет есірткі затын пайдаланып көрген жан бір жолғыдан тәуелді болып қалмаспын деген қызығушылықпен жаман әдетке бой алдырады да, бұл ісін қайталағанын өзі де байқамай қалады. Мұның ақыры есірткіге деген тәуелділікке жеткізіп, біржола байланады. Соның салдарынан өзі азап шегеді, отбасында кикілжің жиілеп, жанұясы күйреуі де мүмкін, – деді Дәурен Сәбитұлы. – Біздің қоғам есірткіге тәуелді жандардан іргесін аулақ салып, туыстары да олардан сырт айналады. Бір атым есірткі үшін ар-ұятты табанға таптап өтіп, әр түрлі қылмыс жасаудан жүрегі шімірікпейтіндердің өмір сүрген ортасына тигізер зияны орасан.
Азаматтық қоғамдағыдай есірткіге байланысты проблемалар әскер қатарында да кездесетіні жасырын емес. Көңіл күйін көтеру үшін сарбаздардың аяқ киімге жағатын кремді нанға жағып жеуді әдетке айналдырып, оның соңы есірткі заттарын пайдалануға ұласқаны туралы ақпарат құралдарында жазылғаны есімізде. Мұндай әуестіктің соңы жастардың болашағына өз қолымен балта шауып, тағдыры талқан болумен бітетіні белгілі.
Есірткі қолданудың алдын алу бағытындағы баяндамасының барысында нарколог дәрігер жауынгер шекарашылардың сұрақтарына жауап беріп, өзі де оларға сауал тастап екі жақты қызықты, әсерлі кездесу өткізді. Жастарды жаман әдеттерден арылып, салауатты өмір салтын ұстанып, қоғамға, ата-анаға, отбасына қадірлі, қажет адам болуға шақырды.
М.МАНАП
