Жетісу облысында көктемгі су тасқыны кезеңіне дайындық күшейтілді. Қазір өңірдегі өзендерде 60 гидробекет үздіксіз жұмыс істеп, су деңгейін бақылауда ұстап отыр. Мамандардың мәліметінше, су көлемі көпжылдық орташа көрсеткіштерге сәйкес, өзен арналарында сең кептелісі тіркелмеген.
Облыстағы 8 су қоймасының 5-еуі жинақтау режимінде. Орташа толу деңгейі — 51 пайыз. Бұл еріген қар суын қабылдауға жеткілікті бос көлем бар екенін білдіреді. Барлық 114 гидротехникалық нысан жіті бақылауға алынған.
Тасқынның алдын алу мақсатында өткен жылы басталған 26 инженерлік жобаның 24-і толық аяқталған. Нәтижесінде 3 мың шақырым қорғаныс дамбылары жөнделіп, 14,8 шақырым арық жүйелері салынды. Сондай-ақ 24 шақырым өзен арналары тазартылып, тереңдетілді.
Қазіргі таңда Талдықорған қаласындағы Қаратал өзенін жағалауды бекіту жұмыстары 65 пайызға орындалды. Ал Қаратал ауданындағы үйінді дамбаны жөндеу жұмыстары 10 пайызға аяқталған. Қазсушар РМК филиалы тәулік бойы кезекшілік ұйымдастырып отыр. Ескелді ауданында және Қызылағаш су қоймасы аумағында заманауи акустикалық құлақтандыру жүйелері орнатылған.
Төтенше жағдайлардың алдын алу үшін 130 мың қап, 5,5 мың тонна инертті материал, 82 тонна жанар-жағармай қоры әзірленді. 235 эвакуациялық пункт дайын тұр. Облыстық резервте 2,6 млрд теңге қарастырылған. Қажет болған жағдайда 2965 адам, 534 техника, 193 мотопомпа мен 27 жүзу құралы жұмылдырылмақ.
