Қоғам өзгерген сайын заң да жаңарып отыруы тиіс. Бұл – табиғи құбылыс. Өйткені Конституция – мемлекеттің басты тірегі, ел дамуының бағыт-бағдарын айқындайтын негізгі құжат. Уақыт алға жылжыған сайын жаңа талаптар туындайды, жаңа міндеттер қойылады. Сол себепті жаңа тарихи кезеңде Конституцияны жетілдіру – заңдылық.
Қазақстан тәуелсіздік алғаннан кейін 1993 жылы алғашқы Ата Заңын қабылдады. 1995 жылы бүкілхалықтық референдум арқылы қазіргі Конституция бекітілді. Ол елдің саяси жүйесін қалыптастырып, мемлекеттік құрылымның негізін қалады. Бұл құжат тұрақтылық пен дамудың құқықтық іргетасына айналды.
Бүгінгі Қазақстан – отыз жыл бұрынғы Қазақстан емес. Қоғам белсенді, жастардың көзқарасы жаңаша, азаматтардың мемлекет ісіне араласуға деген сұранысы артқан. Осындай жағдайда заң да заман талабына сай икемделуі керек.
2022 жылғы референдум арқылы Конституцияға бірқатар маңызды өзгерістер енгізілді. Бұл бастама Қасым-Жомарт Тоқаев жариялаған саяси жаңғыру бағытымен үндес болды. Негізгі мақсат – билік тармақтарының арасындағы тепе-теңдікті күшейту, Парламенттің ықпалын арттыру, азаматтардың құқықтарын қорғау тетіктерін жетілдіру.
Конституциялық соттың қайта құрылуы – соның айқын дәлелі. Енді азаматтар өз құқықтарын қорғау үшін тікелей жүгіну мүмкіндігіне ие болды. Бұл – құқықтық мемлекеттің маңызды белгісі.
Жаңа Конституция немесе оған енгізілген өзгерістер – елдің жаңа кезеңге қадам басқанын білдіреді. Мемлекет дамудың келесі сатысына көтерілгенде, оның негізгі заңы да соған сай болуы керек. Бұл – әлемдік тәжірибеде қалыптасқан үрдіс.
Ең бастысы – Конституция қоғамның сұранысына жауап беруі тиіс. Ол халықтың үні естілетін, әділет үстемдік ететін жүйені қалыптастыруға қызмет етуі керек. Жаңа бағыттарды айқындау үшін мықты құқықтық негіз қажет. Ал ондай негіз – жаңарған Конституция. Сондықтан жаңа Конституция – жай өзгеріс емес, ол елдің болашаққа сеніммен жасаған нық қадамы.
Еліміздегі жастармен қоян-қолтық жұмыс істей отырып, олардың жаңа өмірге деген ұмтылысы мен өзгеріске деген талпынысын күнделікті көріп келемін. Қазіргі жастар – елдің ертеңіне бейжай қарамайтын, өз болашағына жауапкершілікпен қарайтын буын. Осы орайда 15 наурызда өтетін референдумға жастардың белсене қатысуы аса маңызды деп есептеймін. Себебі бұл бастама қоғамның дамуына, ел болашағына тікелей әсер ететін маңызды шешімдердің бірі. Әрбір жастың дауысы – өзгерістерге қосқан нақты үлесі. Сондықтан жастарды азаматтық белсенділік танытып, референдумға қатысуға шақырамын.
Ыбраймолдаев Мақсат Талғатұлы,
Панфилов аудандық жастар ресурстық орталығының жетекшісі
