Қай мемлекеттің де даму бағытын айқындайтын ең маңызды құжат – оның Конституциясы. Негізгі заң тек құқықтық нормалардың жиынтығы ғана емес, ол – елдің саяси жүйесінің, экономикалық дамуының және қоғамдық келісімінің басты тірегі. Сондықтан Конституцияға енгізілетін кез келген өзгеріс пен толықтырулар қоғамның сұранысына сай болуы тиіс. Бүгінде талқыланып жатқан жаңа Конституция жобасы да дәл осындай тарихи қажеттіліктен туындап отыр.
Соңғы жылдары әлемдік саясат пен экономикада үлкен өзгерістер орын алды. Геосаяси жағдай, экономикалық байланыстардың жаңа сипаты, қоғамдағы әлеуметтік талаптардың артуы – мұның барлығы мемлекет басқару жүйесін де жаңартуды қажет ететіні анық. Осы тұрғыдан алғанда жаңа Конституция жобасы еліміздегі саяси және экономикалық өзгерістерге толық жауап бере алатын құжат ретінде бағаланып отыр.
Жаңа жобада мемлекет пен қоғам арасындағы қатынастарды жетілдіруге бағытталған маңызды нормалар қарастырылған. Әсіресе билік тармақтарының арасындағы тепе-теңдікті нығайту, азаматтардың құқықтары мен бостандықтарын қорғау тетіктерін күшейту, мемлекеттік басқару жүйесін тиімді ету сияқты мәселелер басты назарда. Бұл өз кезегінде елдегі демократиялық үрдістерді тереңдетуге және халықтың мемлекет басқару ісіне белсенді араласуына мүмкіндік береді.
Сонымен қатар Конституция жобасы экономикалық дамудың жаңа кезеңіне жол ашатын қағидаларды да қамтиды. Қазіргі заманғы экономиканың талаптарына сай құқықтық негіз қалыптастыру, кәсіпкерлікті дамытуға жағдай жасау, әлеуметтік әділеттілікті қамтамасыз ету – жаңа негізгі заңның басты бағыттарының бірі. Мұндай өзгерістер елдің тұрақты дамуына және халықтың әл-ауқатын арттыруға қызмет ететіні сөзсіз.
Президент Қасым-Жомарт Тоқаев өзінің бір сөзінде: «Реформалардың түпкі мақсаты – әділетті мемлекет пен жауапты қоғам құру» деп атап өткен болатын. Шын мәнінде, жаңа Конституция жобасы да дәл осы мақсатқа жетудің маңызды қадамы ретінде қарастырылып отыр.
Еліміздің болашағына бейжай қарамайтын әр азамат мемлекет өміріндегі маңызды шешімдерге белсенді қатысуы керек. Референдум – халықтың өз таңдауын білдіретін демократиялық жол. Сондықтан жаңа Конституция жобасын қолдау, оған дауыс беру – елдің ертеңіне деген жауапкершіліктің белгісі.
Қорытындылай айтқанда, жаңа Конституция жобасы қоғамның сұранысын ескерген, саяси және экономикалық өзгерістерге бейімделген маңызды құжат. Ол мемлекет дамуының жаңа кезеңіне жол ашып, елдегі тұрақтылық пен бірлікті нығайтуға қызмет етеді. Осындай тарихи сәтте әр азаматтың саналы таңдау жасап, ел болашағына қатысты шешімге атсалысуы – уақыт талабы.
Тоқтарбай КЕРІМҚҰЛОВ,
аудандық ардагерлер ұйымының төрағасы
