Жетісу облысы цифрлық технологиялар басқармасының басшысы Айдын Темірбаев БАҚ өкілдеріне арналған баспасөз-маслихатында «Цифрландыру және жасанды интеллект жылы» аясында атқарылған жұмыстар туралы есеп берді. Бүгінгі таңда өңірде ЖИ элементтері медициналық диагностикадан бастап жол қауіпсіздігі мен білім беруге дейінгі әртүрлі салаларда кеңінен қолданыла бастады.
Атап айтқанда, өңірдің 16 медициналық ұйымында PACS жүйесі енгізілді, оның аясында 1 миллионнан астам медициналық кескін өңделді. Бұл онкологиялық ауруларды ерте анықтау сапасын едәуір арттыруға мүмкіндік берді. Сонымен қатар, 2026 жылға қарай инсульт орталықтарында КТ зерттеу нәтижелерін автоматты түрде талдайтын CEREBRA AI жүйесін іске қосу жоспарлануда.
Қоғамдық қауіпсіздікті қамтамасыз ету мақсатында облыс бойынша Жедел басқару орталығына 20 мыңнан астам бейнебақылау камерасы біріктірілді. 2025 жылы 33 жерде бет-әлпетті тану функциясы бар TARGET-AI жүйесі іске қосылды. Осы жоба аясында тағы 6,5 мыңнан астам жаңа камера орнатылып, Балқаш көлінің жағалауына дейін талшықты-оптикалық байланыс желілері тартылады. Сонымен қатар, Талдықорғанда демеушілік қаражат есебінен құны 4,6 млрд теңге болатын Қаланың тіршілік әрекетін басқару орталығын салу жоспарлануда.
Цифрлық шешімдер көлік инфрақұрылымына да әсер етеді. Жақын арада автомобиль жолдарының жай-күйін мониторингтеу және ЖИ көмегімен жол төсемінің ақауларын анықтау жүйесі пилоттық режимде енгізіледі. Талдықорғанның жол-көлік оқиғаларына бейім учаскелерінде бейнеаналитиканы қолданатын зияткерлік жаяу жүргіншілер өткелдері орнатылады.
