Қазіргі қоғамның тұрақты дамуы мен өркениетті елдер қатарынан көрінуі ең алдымен заң үстемдігіне, әділдік қағидаттарының сақталуына және құқықтық мәдениеттің жоғары деңгейіне байланысты. Осы тұрғыдан алғанда, заң факультеттерінің орны айрықша. Олар тек кәсіби маман даярлап қана қоймай, қоғамның құқықтық санасын қалыптастыруға, азаматтардың заңға деген құрметін арттыруға тікелей ықпал етеді.
Әл-Фараби атындағы ҚазҰУ-дың Заң факультеті бұл болашақ заңгерлердің, судьялардың, адвокаттардың, нотариустардың, мемлекеттік қызметкерлердің кәсіби іргетасы қаланатын білім ордасы. Мұнда студенттер тек теориялық білім алып қана қоймай, құқықтық нормаларды тәжірибеде қолдану дағдыларын меңгереді. Қазіргі таңда заң факультеттерінде білім беру үдерісі заман талабына сай жаңартылып, халықаралық стандарттарға бейімделіп келеді.Оқу бағдарламалары азаматтық құқық, қылмыстық құқық, әкімшілік құқық, еңбек құқығы, халықаралық құқық сияқты негізгі салаларды қамтиды. Әр пән студенттің құқықтық ойлау қабілетін дамытып, нақты жағдайларда дұрыс шешім қабылдай білуіне ықпал етеді. Сонымен қатар, құқықтық талдау, заңнаманы түсіндіру, дәлелдемелермен жұмыс істеу сияқты кәсіби дағдылар жүйелі түрде қалыптастырылады.
Заманауи заң факультетіміздің басты ерекшелігі-теория мен практиканың ұштасуы. Студенттер оқу барысында сот процестерінің үлгілік форматтарына қатысып, кейс тапсырмаларды шешеді, құқықтық құжаттар әзірлеуді үйренеді. Әсіресе заң клиникаларының рөлі ерекше. Заң клиникалары арқылы студенттер халыққа тегін құқықтық көмек көрсетіп, нақты өмірлік жағдайлармен жұмыс істейді.Заң факультеті тек білім беру орталығы ғана емес, сонымен қатар ғылыми зерттеу алаңы. Мұнда құқық саласындағы өзекті мәселелер зерттеліп, заңнаманы жетілдіруге бағытталған ұсыныстар әзірленеді. Студенттер ғылыми жобаларға қатысып, конференциялар мен пікірталастарда өз ойларын білдіреді.
Бүгінде құқық саласында цифрландыру үдерісі қарқынды дамып келеді. Электронды сот жүйелері, онлайн құқықтық қызметтер, жасанды интеллект элементтері заң саласына еніп, жаңа талаптар қалыптастыруда. Осыған байланысты білім ордамызда оқу мазмұнын жаңартып, студенттерді цифрлық құқықтық ортада жұмыс істеуге бейімдеуде. Болашақ заңгер тек заңды біліп қана қоймай, цифрлық құралдарды тиімді қолдана алуы тиіс.
Заң факультетінің тағы бір маңызды миссиясы құқықтық мәдениетті қалыптастыру. Студенттер тек кәсіби маман ретінде ғана емес, қоғамдағы әділдік пен заңдылықтың сақталуына үлес қосатын тұлға ретінде тәрбиеленеді. Оқу барысында адалдық, жауапкершілік, адам құқықтарын құрметтеу сияқты құндылықтар басты назарда болады.
Сонымен қатар, оқу орнымыз мемлекеттік органдармен, құқық қорғау ұйымдарымен, сот жүйесімен тығыз байланыста жұмыс істейді. Мұндай әріптестік студенттердің тәжірибеден өтуіне, кәсіби ортаға ерте бейімделуіне мүмкіндік береді. Дәрістер мен кездесулерге тәжірибелі заңгерлер, судьялар, адвокаттар шақырылып, өз тәжірибелерімен бөліседі
Қоғамдағы кез келген құқықтық мәселенің шешімі білікті мамандарға байланысты. Сондықтан заң факультетінің түлектері тек жеке мансап құрумен шектелмей, елдің құқықтық жүйесінің дамуына үлес қосуы тиіс. Олар әділдік пен заңдылықтың сақталуын қамтамасыз ететін негізгі күшке айналады.Заң факультетінде алынған білім бұл тек мамандық емес, бұл қоғам алдындағы үлкен жауапкершілік.
Усеинова К.Р.,
Әл-Фараби атындағы ҚазҰУ Заң факультетінің
мемлекет және құқық теориясы мен тарихы,
конституциялық және әкімшілік құқық
кафедрасының меңгерушісі, з.ғ.к.
Тойжан Мәдина Нурланқызы,
Заң факультетінің 1 курс магистранты
