Жетісу облысында есірткімен күрес қарқынды жалғасуда. Жыл басынан бері тәркіленген заңсыз заттардың көлемі өткен жылмен салыстырғанда екі есеге жуық өскен. Есірткі қылмысына қарсы іс-қимыл шаралары туралы толығырақ Жетісу облысы ПД Есірткі қылмысына қарсы іс-қимыл басқармасы бастығының орынбасары Ерасыл Узаков Өңірлік коммуникациялар қызметінің ақпараттық алаңында өткен баспасөз мәслихатынды баяндады.
Полицейлер Талдықорған қаласында есірткі өндірісімен айналысқан екі бірдей ірі зертхананы жойды. 4 айдың ішінде заңсыз айналымнан 101 келіден астам есірткі алынды. Оның ішінде тек марихуананың салмағы 93 келіден асса, 1 келіден астам синтетика мен 6 келіге жуық гашиш тәркіленген. Жедел іс-қимылдар барысында 43 адам құрықталды, олардың арасында есірткіні жасырын жерлерге қойып кетумен айналысқан 7 есірткі жасырушы бар.
Тәртіп сақшылары тек көшедегі қылмыспен ғана емес, виртуалды әлемдегі наркобизнеспен де белсенді күресуде. «Кибербақылау» жүйесі арқылы 1000-нан астам есірткі сайты бұғатталса, «Антифрод» бағдарламасы 5 миллион теңге айналымы бар 313 банктік шоттың жолын кесті. Сонымен қатар, халықаралық деңгейдегі 20 мыңға жуық күдікті шот пен 5 мыңнан астам крипто-әмиянды бұғаттауға сұраныс жіберілді.
Дәріханалар да назардан тыс қалған жоқ. «Дәрмек» операциясы кезінде полицейлер 10 дәріхананың есірткі тектес препараттарды рецептсіз сатып келгенін анықтады. Тексеріс барысында 9 мыңға жуық психотроптық ампула мен есірткі жасауға қолданылатын 23 тонна тұз қышқылы тәркіленді. Тіпті, түнгі клубтар мен кафелердегі «көңіл-күй газының» айналымына дейін қатаң тексеріске алынды.
Облыстық денсаулық сақтау басқармасының мәліметінше, қазір өңірде 232 адам нашақорлық дертімен есепте тұр, олардың 40-ы – 18 бен 29 жас аралығындағы жастар. Алдағы маусым айынан бастап полиция «Қарасора-2026» ауқымды операциясына кіріспек. Ол үшін облыстың шөлейтті аймақтарын тікұшақпен барлап, есірткі алқаптарын әуеден іздеу жоспарланған.
