Өткен жылы ҚР СИМ Жетісу облысы бойынша сауда және тұтынушылар құқықтарын қорғау департаментіне 1242 өтініш түскен. Нәтижесінде тұтынушыларға жалпы сомасы 67 001 915 теңге қайтарылды.
2024 жылы тұтынушылар құқықтарын қорғау саласында 9 жоспардан тыс тексеріс жүргізіліп, барлық жағдайда Қазақстан Республикасының «Тұтынушылар құқықтарын қорғау туралы» Заңының талаптары бұзылғаны анықталды. Тексерістер қорытындысы бойынша кінәлі тұлғалар әкімшілік жауапкершілікке тартылды.
Сауда саласында өткен жылы 134 жоспардан тыс тексеріс өткізілді. Оның 117-сінде Қазақстан Республикасының «Сауда қызметін реттеу туралы» Заңының әлеуметтік маңызы бар тауарларға шекті сауда үстемесін асыру бойынша талаптарының бұзылғаны анықталды. Тексеру нәтижесінде кінәлі тұлғалар әкімшілік жауапкершілікке тартылды.
Сондай-ақ тұтынушылар құқықтарын қорғау мәселелері бойынша әлеуметтік және аналитикалық зерттеу жүргізілді. Зерттеудің мақсаты – тұтынушылар құқықтарын қорғау жүйесінің жағдайын, мәселелерін және даму перспективаларын анықтау болды. Зерттеу екі кезеңде өткізілді. Онлайн-сауалнама республикалық ауқымда soc-opros.kz сайтында жүргізілді. Нәтижесінде Жетісу облысы респонденттерінің 82%-ы «қызмет көрсету сапасына қанағаттанбағанын» жеткізген. Қанағаттанбаушылық әсіресе қалааралық/халықаралық көлік қызметтері мен такси қызметтеріне қатысты болды. Сонымен қатар «Электр энергиясын жеткізуші компаниялардың қызмет сапасына қанағаттанасыз ба?» деген сұраққа өңір респонденттерінің 70%-ы «қанағаттанбаймыз» деп жауап берген. Жетісу және Солтүстік Қазақстан облыстарының респонденттерінің 65%-ы тұтынушылық құқықтарын қорғау мәселелеріне қызығушылық танытқанын мәлімдеді.
