Мемлекет басшысы Қасым-Жомарт Тоқаевтың Қазақстан халқына Жолдауындағы «Қуатты ұлттың діңгегі – халық. Ең бастысы, азаматтардың денсаулығы мықты, білімі терең болуы керек» деген сөзін басшылыққа ала отырып, «Төртеу түгел болса төбедегі келеді, алтау ала болса ауыздағы кетеді» қағидасымен жыл басында Алмалы ауылындағы Елтінді батыр атындағы орта мектебі жанынан құрылған қамқоршылық кеңестің мүшелері ақылдаса келе келешек ұрпағымызды рухани және материалдық жағынан қолдау мақсатында арнайы қор құрған болатын.
«Елімізге, жерімізге қамқор болатын елжанды азаматтар қазіргі мектеп қабырғасында тәрбиеленіп жатқан оқушылардың арасынан шығатыны себепті қордың атын «БОЛАШАҚ» деп атадық. Бұл қорға қосылған әр азамат айына өз мүмкіндігіне қарай қорға қаржы салады. Жұмысымыздың негізгі мақсаты ауыл ішіндегі тұрмысы төмен және қамқорлықсыз қалған отбасыларға демеушілік жасап, олардың өзге азаматтармен тең деңгейде өмір сүрүіне көмек көрсету. Және сонымен қатар мектебіміздегі қамқоршысы жоқ оқушыларға қамқорлық көрсету, рухани демеу. Бұл игілікті іс-шара ауыл азаматтарының арасында кеңінен қолдау тауып, ерікті қорға қаржы аударушылардың саны қауырт өсіп, екі жүздей адамды құрады. Қор құрылғаннан бері өзара ақылдаса келе және мектеп әкімшілігінің де ұсыныстарын негізге ала отырып тұрмысы төмен отбасылардың бес баласына мектеп формасын және қажетті оқу құрал-жабдықтарын сатып алынып тапсырылды», – дейді қордың төрағасы Болат Құрсақбай мырза.
Мектеп қабырғасындағы оқушылардың денсаулығы мықты, шымыр болып өсу үшін спортық шаралардың да беретін көмегі мол. Кей кездері әртүрлі спортық жарыстарға оқушыларды жеткізу қаржылық қиындықтарды тудырады. «Болашақ» қоры бұл қиындықтан шығудың жолын көрсетіп отыр. Мысалы, Талдықорған қаласындағы өткізілетін кіші футбол жарысына қатысатын оқушы қыздардың жол ақысына қолдау көрсетті. Сол сияқты тұрмысы төмен отбасының екі баласы ай сайын мектеп асханасынан тегін ыстық тамақтануы ұйымдастырылды.
«Ендігі кезеңде алдыға қойып отырған мақсатымыз ауылдағы материалдық жағынын аз қамтылған және көпбалалы отбасылардың балаларын қыстық жылы киіммен қамтамасыз ету. «Оқуға құштар мектеп» жобасы аясында мектеп оқушыларының кітап оқу бәсекелестігін арттыруға қаржылай сыйлық тағайындау. Осы арқылы оқушылардың зияткерлік қабілетін жетілдіру. Орта мектепті бітірушілер арасында, ұлттық бірыңғай тестілеуден үздік балл көрсеткен бір ұл, бір қызға қаржылай сыйлық белгілеу. Бұл болашақта мектеп оқушыларының оқуға қызығушылығын артырады деп ойлаймыз. Қазақстан Республикасының оқу-ағарту министрі А.Аймағамбетов республикалық, халықаралық жарыстарда озып шыққан оқушыларға жүлделер тағайындағаны белгілі. «Болашақ» қоры да осы үлгіні қолдау мақсатында республикалық, облыстық жарыстарда жүлделі орынға ие болған мектеп оқушыларына қаржылай арнайы сыйлық ұсынбақшымыз», – деп атап өтті қор төрағасы.
«Қайырымдылық жасасаң, қайырын өзің көресің» дегендей қайырымдылық жасаудан шаршамайық.
