Жаркент өңірінің тумасы Ақтоты Асанова әл-Фараби атындағы Қазақ ұлттық университетінің бейіндік мектебінде білім алған дара талантты түлек. Бұл дарынды қызымыз 15 жасынан-ақ Алматыдағы үлкен тіл орталығында ағылшын тілінен дәріс бергендігімен де ерекшеленеді. Сөйтіп, өзін шектеп қалмай, одан әрі тынбай еңбек етуінің арқасында 17-ге жаңа толған тума талант екі бірдей шет елдің жоғары оқу орнының гранттарын жеңіп алды. Біріншісі – Пекин Тіл және мәдениет университетінің Шетел филологиясы факультетінің «аудармашы» мамандығына, екіншісі – Эге университетінің (Түркия, Ізмір) Халықаралық қатынастар факультетінің «Экономика және бизнес» мамандығы бойынша.
Ол қазірдің өзінде ағылшын, түрік, қытай, испан, француз, орыс тілдерінде еркін сөйлей алады. Ақтоты бес жылда алты елдің тілін үйренген. Әрине, негізгі тіл – өзінің ана тілі. Ақтоты қазақ тілін шексіз сүйеді және өте шешен сөйлейді. Оның өзіндік тәжірибесі бойынша шамамен тоғыз ай мен он екі айдың арасында кез-келген тілді меңгеруге болады екен. Әрине, бұнда негізгі алдыға қойылған мақсат пен нәтижеге жетуде білімді, іскер, тәжірибелі, талапшыл мұғалімді таңдай білудің де үлкен рөл ойнайтынын ескеру керек.
Міне, өзінің талантымен шетелге танылған көптілді меңгеруші Ақтоты қызымызды ел-жұртқа таныстырып, қуанышымызды сіздермен бөлісіп жатқан жайымыз ба, ағайын! Қызымызға тілегіміз, Қазақ елін әлемге танытар, кейінгі ұрпаққа үлгі болар танымал тұлға болсын! Қайда жүрсе де еліміздің көк туын көкке желбіретер халқының аяулы қызы атанып, сәттілік әрдайым жан серігі болсын!
Қ.Тұрдығазыұлы
