Бұл тақырыпта көптен бері ой қозғағым келіп жүр еді, қоғамда орын алып жатқан жағдайларға байланысты жанайқайымды жеткізбеске амал жоқ.
Жалпы, мектеп жасындағы балалардың ата-анасы арақ ішетін болса, ол отбасыны сәтсіз құрылған жанұяға балап жатады. Оған толық келісемін. Себебі, баласының болашағын, отбасының абыройын ойлаған ата-ана арақты аузына да алмайды деп білемін. Әкесінің араққа сылқия тойып алғанын, анасының тепкінің астында қалып жүргенін, от анасы мен отағасының аузынан ақ ит кіріп, көк ит шығып жатқандарын көріп өскен баладан қандай болашақ күтеміз?
Бала ұяда не көрсе, ұшқанда міндетті түрде соны іледі. Сол себепті, ертеңгі күні баладан бірдеңені талап ету үшін ата-ана әу бастан өзін түзеуі керек.
Әкесінің досы жыныстық қатынасқа күштеп түсіріп, зорлық көрсеткен қаршадай қыз естеріңізде болар? Сол қыздың ата-анасы ішкілікке салынғаны да баршаға мәлім. Ол отбасыны енді қалай сәтті отбасыға жатқыза аламыз?
Отағасы араққа тойып алып, бесіктен белі шықпаған баласын атқа мінгізіп, еркіне жіберіп, артынша сол аттың үстінен баласының мәйітін алған отбасы бар. Оларды сәтсіз отбасыға жатқызайын десең, бала-шағасына керемет көңіл бөледі, озат оқушылар санатында, тамақтары тоқ, киімдері бүтін. Тек сол бір күн ішкен шайтан судың кесірінен баласының өліміне себеп болып қалған «әке» өзін енді өмір бойы жазғырып өтеді-ау.
Бұл арақтың қоғамға тигізіп жатқан зиянының бергі жағы ғана, бұдан да сорақылары қаншама? Арақ ішкен адам өзінің ақылын бірге ішетіні баршаға аян. Тіпті, бірге отырып шайтан сумен бөліскен жақын достардың өзі тойынып алған соң, бір-біріне шабуылдап, аяғы қайғылы оқиғаға ұласып жүргендерін де көріп, естіп, біліп жүрміз.
Осы тұрғыда өз ойым, балаға қаршадайынан діни тәрбие қоса берілуі керек сияқты. Аузында Алласы, жүрегінде иманы бар, тілі кәлимаға келіп тұрған жас аузын ащы сумен былғамас деп ойлаймын. Сіз не дейсіз?
Тоғжан НҰРҒАЛИҚЫЗЫ
