5 наурызда аудан әкімдігінің мәжіліс залында Панфилов аудандық дүнген этномәдени орталығының есеп беру – сайлау конференциясы болып өтті. Аудандағы этномәдени орталықтардың мүшелері, жергілікті бұқаралық ақпарат құралдарының өкілдері, барлығы 150-ге жуық адам қатысқан жиналысты республикалық дүнген этномәдени орталығының төрағасы, Қазақстан Халқы Ассамблеясы кеңесінің мүшесі Зайнуддин Абдулбахтиярұлы Махусеев кіріспе сөз сөйлеп ашып, конференция қонақтарымен таныстырды.
Басқосуға Қазақстан Республикасы Президенті Әкімшілігінің Қазақстан Халқы Ассамблеясы төрағасының орынбасары, хатшылық меңгерушісі Марат Алмасұлы Әзілханов, республикалық дүнген этномәдени орталығы байқау кеңесінің төрағасы Лугмар Харкиұлы Буларов, Қазақстан Парламенті Мәжілісінің 7-шақырылым депутаты, ҚХА кеңесінің мүшесі Ильяс Юсупұлы Буларов, Қазақстан Парламенті Мәжілісінің 6-шақырылым депутаты Шакир Хусаинұлы Хахазов, Жетісу облысы қоғамдық даму басқармасының басшысы Бауыржан Бақытұлы Әбибеков, «Қоғамдық келісім» коммуналдық мемлекеттік мекемесінің басшысы Руфина Қасымқызы Усанова, Панфилов аудан әкімінің орынбасары Қанат Нұркешұлы Досмаилов қатысты.
Алқалы басқосуда дүнген этномәдениет орталығының төрағасы Исмаз Хакиұлы Лосанов 2015 жылдан бері қоғамдық ұйымда атқарылған жұмыстар жөнінде есепті баяндама жасады. Жетісу облысында жалпы дүнген диаспорасының 1131 өкілі бар болса, солардың басым бөлігі, яғни, 949-ы Жаркент өңірін мекендейді. Олар Қазақстан халқы Ассамблеясы ұйымдастырған барлық маңызды шараларға белсене атсалысады. Орталықта жастар тәрбиесі, ұлтаралық татулық пен келісім әрдайым басты назарда ұсталады.
Есепті баяндаманы талқылауға кәсіпкерлер Ж. Масыров, Р. Лосева, Қазақстан Парламенті Мәжілісі 7-шақырылымының депутаты И. Буларов, Астана қаласынан келген кәсіпкер Ш. Хахазов, Жамбыл облыстық мәслихатының депутаты Л.Буларов қатысты. Конференцияда ұйымдық мәселе қаралып, республикалық дүнген этномәдени орталығының Жетісу облыстық және Панфилов аудандық филиалының төрағасы болып Сарди Дифу сайланды.
Есепті жиын соңында өңірге Астанадан арнайы келген Қазақстан Республикасы Президенті Әкімшілігінің Қазақстан Халқы Ассамблеясы төрағасының орынбасары, хатшылық меңгерушісі Марат Әзілханов сөз сөйлеп, конференция жұмысын қортындылады. Марат Алмасұлы бұдан кейін аудандық «Аманат» партиясы Панфилов аудандық филиалының ғимаратында өңірдегі ұйғыр және славян этномәдени орталықтарының өкілдерімен кездесіп, жұмыстарымен танысты.
Толқын ЕРБОЛҚЫЗЫ
