Әлі есімізде, осыдан дәл отыз үш жыл бұрын Жоғарғы Кеңес «Мемлекеттік егемендік туралы» декларация қабылдады. Бұл тарихи құжат Қазақстанның болашақ тәуелсіздігінің берік іргететасы болып саналды. Өйткені мұнда мемлекетіміздің жеке жер аумағы, азаматтығы, мемлекеттік бюджеті, халықаралық қатынастағы дербестігі бекітілді. Сөйтіп, бұл акт арқылы әлем картасындағы жаңа мемлекет — Қазақстан Республикасының негізі қаланды. Сол сәттен тартып еліміз өзгелермен терезесі тең жеке мемлекет ретінде танылды.
Баршаға белгілі, «Республика күні» елімізде 1992 жылдан бастап тойлана бастаған болатын. Дегенмен, 2009 жылы мемлекеттік мерекелер тізімінен алынып тасталды. Алайда, 2022 жылғы 16 шілдеде Ұлытауда өткен Ұлттық Құрылтайда Қазақстан Республикасының Президенті Қасым-Жомарт Кемелұлы Тоқаев: «Ұлттық мерекелер мен атаулы күндер тізбесіне бірқатар өзгеріс енгізген жөн. Мен «Республика күніне» ұлттық мереке мәртебесін қайтаруды ұсынамын. Сондықтан, қазанның жиырма бесі күнін еліміздің басты мерекесі «Егемендік күні» ретінде жыл сайын атап өтуіміз керек. Республика күні елдің мемлекет құру жолындағы тұңғыш тарихи қадамының символы болуы қажет» деп баршамыздың көкейімізден шығатын байламды сөзін айтып, куантып тастады.
Негізі, ұлттық мереке – туған жерін, Отанын сүйетін әрбір қазақстандық үшін ұлық күн. Ата-бабамыз сан ғасырлар бойы аңсаған осынау азат күнге жету жолында қаншама тер, қаншама қан төкті. Талай-талай «тар жол, тайғақ кешуден» өтіп, әйтеуір осы күнге жеттік.
Біз қазір өте күрделі кезеңде өмір сүрудеміз. Айналамыз — аласапыранға толы. Сұм соғыстың салдарынан алыс-жақын шетелдерде адам айтқысыз ауыр қасірет орын алып, адам қаны суша ағып жатыр. Көрікті қалалар мен көркем табиғаттың күлі көкке ұшуда. ан майданның қайғысына қоса алпауыт елдер салған әр алуан санкциялар да экономикалық жағынан тығырыққа тіреуде.
Мұндай сын сәтте етек-жеңімізді жиып, кез келген келеңсіздіктің алдын алуға сақадай-сай әзір отырмасақ, опық жеп қалуымыз оп-оңай. Сондықтан еліміздің ішкі-сыртқы саясат мәселелеріне де баса мән беріліп, «Жаңа, әділетті Қазақстан» құру жолында аса ауқымды реформалық өзгерістер жүзеге асуда деп ойлаймыз.
Алайда, алдымызда атқарған ісімізден — жүзеге асырар жұмыстарымыз тіптен көп екенін жақсы білеміз. Егер татулықты ту етіп, жұрт болып жұмылсақ, әлі талай асулардан аса беретініміз сөзсіз. Осы бағыттағы қадамдарымыз жетістіктерге жетелей берсін. Ұлттық мереке – Республика күні құтты болсын, ардақты ағайын!
Дүйсенбек ӘЛІМЖАНОВ,
қоғам белсендісі,
Жаркент қалалық мүгедектер
қоғамының төрағасы
