Еліміздің бірқатар өңірлеріндегі су тасқыны баршаны алаңдатып отыр. Он облыста төтенше жағдай режимі белгіленді.
Ғасырға жуық уақыт бері мұндай апатпен еліміз бетпе бет келген емес.
Жойқын су тасқыны жылдар бойы шешілмеген, жүйелі түрде жүргізілмеген жұмыстар мен әр деңгейдегі үлкен мәселелердің бетін ашты.
Қарғын су тұрғын үйлерді басып, жолдарды шайып, мыңдаған мал қорада қалып, суға тұншығып мерт болып, тұрғындар шұғыл түрде эвакуацияланып жатыр.
Мемлекет басшысы бүгінгі Үндеуінде, атқарушы органдар жіберген олқылықтарды түзеу үшін шұғыл түрде нақты тапсырмалар берілгенін және барлық қажетті шаралар қабылданып жатқанын айтты.
Үкімет қарғын судың алдын ала алмаса да, салдарын жоюға бар күшін салуда.
Премьер-Министрдің басшылығымен Республикалық штаб құрылды. Премьер-Министрдің өзі, оның орынбасарлары және Төтенше жағдайлар министрі апат болған аймақтарды аралап жүр. Қазақстан Парламенті Сенатының депутаттары да бірқатар өңірлердегі жағдаймен өз көздерімен танысып қайтты.
Барлық құтқару жұмыстары қазір Мемлекет басшысының тікелей бақылауында.
Су тасқынымен күресуге Төтенше жағдайлар министрлігінің ресурстарымен қатар, Ішкі істер министрлігі, Ұлттық ұлан, Қарулы Күштер және Ұлттық қауіпсіздік комитетінің мамандары тартылып жатыр.
Зардап шеккен аймақтар халқының жай күйін барынша жеңілдетуге күндіз-түні жұмыс істеп жатқан жергілікті әкімдіктерге , еліміздің мыңдаған волонтерлары да көмек қолдарын созып жатыр. Республикалық, аймақтық қайырымдылық шаралары ұйымдастырылып, өңірлерге гуманитарлық жүктері жөнелтіліп жатыр.
“Жағдай өте күрделі болса да, біз қиындықты міндетті түрде еңсереміз, барлығын қалпына келтіреміз. Ең бастысы – азаматтардың амандығы”— деді Қасым-Жомарт Тоқаев.
Тәжірибе көрсеткендей, сыни жағдайларда сабырлық сақтау стратегиясы шығындарды азайтудың негізгі факторы болып табылады. Бұл тұрғыда онсыз да абдырап, қиналған жұртты жалған ақпаратпен дүрліктіруге жол бермей, керісінше, үздіксіз ресми ақпараттың таралуы аса маңызды. Бұқаралық ақпарат құралдарының шұғыл да, үзліксіз кәсіби ақпарат таратып отыруы — көмекке зәру жандар үшін де, оларға көмек көрсетушілер үшін де, түрлі деңгейдегі билік өкілдері үшін де аса қажет.
“Тасқын судан зардап шеккен азаматтарға айтарым, мемлекет бірде-бір адамды ескерусіз қалдырмайды. Баршаңызға қаржылық және басқа да көмек беріледі. Материалдық шығындар толық өтеледі. Халыққа көмектесу үшін Үкіметке мемлекеттік материалдық резервті пайдалануды тапсырамын. Сондай-ақ Үкімет шығындарды өтеудің тиімді жолдарын шұғыл қарастыруға тиіс. Оны зардап шеккен азаматтарға жан-жақты түсіндіру керек. Берілетін өтемақы шығынды толық жабуы қажет “, — деді Қ. Тоқаев Қазақстан халқына үндеуінде.
Ғалымдар мен сарапшылардың пікірінше, әлемде климаттық үлкен өзгерістер салдарынан түрлі табиғи апаттар жиілеуі ықтимал. Оған өзіміз де соңғы жылдары күә бола бастадық.
Халқымыздың “сақтансаң, сақтаймын” деген дана сөзін де ұмытпауымыз керек.
Мемлекет басшысы, біз алапат су тасқынынан тиісті қорытынды шығаруымыз керек. Яғни, жіберілген олқылықтарды түзетіп, тиісті сабақ алуымыз қажет. Ал ондай сабақтар аз емес. Апаттардың алдын алу жұмысындағы кемшіліктен бастап, су шаруашылығы мамандарының тапшы болуы, табиғатқа немқұрайлы қарауға дейін көп мәселені реттеу қажет, — деді.
“Саққа құдай жақ” деген қазақ. Мұны биліктің де, халықтың түйсінетін уақыты келгені рас.
Бибігүл ЖЕКСЕНБАЙ,
ҚР Парламенті Сенатының депутаты
