Ауданымызда әлемге әйгілі суретші жерлесіміз Әбілхан Қастеевтің 120 жылдық мерейтойы құрметіне арналған әр алуан танымдық-тағылымдық шаралар өткізу дәстүрі одан әрі жалғасуда. Осындай орасан зор тәрбиелік маңызы бар кеш жуырда Жаркент жоғары педагогикалық колледжінде өтті.
«Мектепке дейінгі тәрбие мен оқыту» кафедрасы апталығының ашылуы аясында өткен бұл шара «Тарих. Тағдыр. Тұлға» деп аталды. Колледждің байырғы тәжірибелі оқытушылары Елмұрат Оразымбеков пен Нұргүл Тумаеваның ұйымдастыруымен өткізілген аталмыш кездесу кеште кафедра меңгерушісі Жәмила Рахметжанова, Қазақстан Суретшілер одағының мүшесі, академик Ақан Оймауытов, «Ә.Қастеев көркемсурет галереясының» қызметкері, суретші Мұрат Шалғымбаев және Жаркент жоғары педагогикалық колледжінің түлегі, суретші Оразбай Жақып қатысып, студенттермен өздерінің өнер, білім, қоғам жайлы құнды ой-пікірлерімен бөлісті.
Кеште халық суретшісінің өмірі мен шығармашылығы туралы бейнефильм көрсетілді. Сонымен қатар көрермендер назарына суретшінің балалық шағы жайлы сахналық қойылым ұсынылды. Ал ең бастысы – студенттерге Әбілхан атаның «Шежін өзенінің аңғарында», «Қапшағай су электр стансасында», «Колхоздағы сүт фермасы», «Кенесары хан», «Амангелді», «Тау көріністері», тағы басқа да жауһар туындылары таныстырылып, келген қонақтар олар жайлы мол танымдық мағлұмат берді. «Ә. Қастеевтің ізбасарлары» деген бөлімде студенттер өз шеберліктерін байқатып, сурет салды, Көрнекті қыл қалам шебері Ақан Оймауытов ерекше көзге түскен талапкерлерге қолтаңбасын қалдырды.
Кеш соңында колледж директоры Клара Құрабалдиева қорытынды сөз сөйлеп, қазақ бейнелеу өнерінің көшбасшысы атанған Әбілхан атамыздың 120 жылдық мерейтойы құрметіне өткізілген бұл шараға оң баға берді.
Рыскүл ҚОЖАБЕРГЕНОВА,
қазақ тілі мен әдебиетінің магистрі
