Байырғы бабалардан қалған «Жас келсе – іске» деген сөздің еліміздегі мемлекет басқару, заң шығару, өзге де ел тағдырына жауапты салаларда нақты көрініске айнала бастауы бізді шынымен қуантады. Ел ертеңі саналатын жастарымыздың халық тағдырына жауапты салаларда еңбектеніп, мемлекет басшысы Қасым-Жомарт Тоқаевтың сындарлы саясатын дұрыс жүзеге асыру ісінде белсенділік танытуы да әділетті қоғам орнатуға талпынған еліміздің бір жетістігі деп санауға негіз болары сөзсіз.
Бұл жайтты бүгінгі өткен барлық деңгейдегі мәслихаттар депуттарының ІІ республикалық форумында Президентіміз Қасым-Жомарт Кемелұлы өз сөзінде атап өтті. «Ашығын айтсақ, бұрын саяси партиялар түрлі санаттағы азаматтармен жұмысқа көп көңіл бөлмейтін. Заңмен талап еткеннен кейін ғана мән бере бастады. Мысалы, партиялық тізімде жастарға арнайы квота бөлінді. Бұл шешім олардың қоғамдық-саяси үдеріске араласуына жол ашып берді. Бұрын мәслихаттағы жас азаматтардың үлесі 2 пайызға да жетпейтін. Қазір заңнамаға енгізілген өзгерістердің нәтижесінде бұл көрсеткіш еселеп артты деуге болады. Бүгін де ортамызда көптеген жас депутаттар отыр. Олар түрлі мінберден жастарға қатысты өзекті мәселелерді батыл көтеріп жүр. Өкілді билікте әйелдердің қатары көбейе түсті. Елімізде қыз-келіншектердің бастамаларына жан-жақты қолдау көрсетілуде. Әйелдердің құқығын қорғауға баса назар аударылып жатыр. Осының бәрі реформаның нақты нәтижесі екені сөзсіз», – деген Қасым-Жомарт Тоқаев мәслихат депутаттарының жергілікті экономикалық саясатқа ықпалын арттыра түсу керектігін де баса айтты.
Демек алдағы уақытта кәсіби тұрғыда шыңдалған, халық пен билік арасына алтын көпір бола білетін, жергілікті бюджеттің дұрыс жұмсалуын қатаң қадағалайтын мәслихат депутаттарына деген халық сенімі де нығая түспек.
«Осыдан бірнеше жыл бұрын маған біреу «Парламенттің төрінде елдің сөзін сөйлейсің» десе өзге түгіл өзім сенбейтін едім. Қазір сол өзгерістердің ортасында жүрмін. Кезінде көшеде, монументтің маңында айтылатын халықтың сөзі бүгін Мәжілістің мінберінен айтылуда. Бұрынғы қасаң қағидалар, қатып-семген түсініктер келмеске кетті десем артық айтқандық емес. Қазіргі Мәжіліс пен мәслихаттарға халықтың сөзін сөйлей алатын, ұлтты ұйыстыра білетін азаматтар шоғырланған», – деген ҚР Парламенті Мәжілісінің депутаты, белгілі айтыскер ақын Ринат Зайытовтың сөзі ел ертеңіне деген жастардың сенімін нықтай түспек.
Медет МҰҚАТАЙ,
Жетісу облыстық мәслихатының депутаты
