11 ақпан күні «Аmanat» партиясы аудандық филиалында «Мемлекеттік тіл – конституциялық кеңістікте» атты тақырыпта жастармен мазмұнды кездесу өтті. Жиын барысында мемлекеттік тілдің қоғам өміріндегі орны, оның құқықтық негіздері мен болашақ ұрпақ алдындағы маңызы кеңінен талқыланды.
Бұл мәселе тек тіл саясатының аясымен шектелмейтіні ерекше атап өтілді. Мемлекеттік тіл – елдің тұтастығы, ұлттық бірегейлігі, құқықтық мемлекет қағидаттары мен азаматтық жауапкершілік ұғымдарымен тікелей сабақтас. Өйткені тіл – тек қарым-қатынас құралы ғана емес, ол – халықтың тарихи жадын, рухани болмысын, дүниетанымын сақтап, ұрпақтан-ұрпаққа жеткізетін құндылық.
Мемлекеттік тіл – мемлекеттіліктің басты нышандарының бірі. Ту, Елтаңба, Әнұран секілді, тіл де – егемендіктің айшықты символы әрі қоғамды біріктіруші қуатты күш. Ол – ортақ түсіністік пен келісімнің, ұлттық рух пен азаматтық бірліктің алтын арқауы. Конституциялық кеңістікте мемлекеттік тілдің орны ерекше екені де сондықтан. Ол заңмен бекітілген мәртебеге ие бола отырып, қоғамдық қатынастардың барлық саласында қызмет етуге тиіс.
Кездесу барысында жастар тілдің құқықтық мәртебесі туралы өз ойларын ортаға салып, мемлекеттік тілді дамыту мен қолдану аясын кеңейту жолдары жөнінде пікір алмасты. Әсіресе, мемлекеттік тілдің қоғамдық өмірде, білім беру жүйесінде, цифрлық кеңістікте және қызмет көрсету саласында кеңінен қолданылуы ел болашағы үшін аса маңызды екені айтылды.
Жастардың белсенділігі мен сергек ойлары бұл бағыттағы жұмыстардың жандана түсуіне серпін беретіні анық. Себебі тіл тағдыры – ұлт тағдыры. Ал ұлт тағдырына бейжай қарамау – әр азаматтың парызы.
Осындай мазмұнды кездесулер мемлекеттік тілдің мәртебесін арттыруға ғана емес, жас буынның құқықтық сауаттылығын күшейтіп, азаматтық ұстанымын қалыптастыруға да ықпал етеді. Тілге құрмет – елге құрмет. Тілге жанашырлық – тәуелсіздікке адалдық.
