Ел тағдырына әсер ететін маңызды шешімдер қабылданатын кезеңдерде қоғамның әрбір мүшесі өз ұстанымын білдіруі қажет. Өйткені мемлекет тағдыры – тек саясаткерлердің ғана емес, бүкіл халықтың ортақ жауапкершілігі. Алдағы 15 наурызда өтетін референдум да дәл осындай тарихи сәттердің бірі. Бұл күні еліміздің азаматтары жаңа Конституция жобасына қатысты өз пікірін білдіріп, елдің болашақ даму бағытын айқындауға мүмкіндік алады.
Қазақстан – баршамыздың таңдауымыз бен ұстанымымыздан құралған Әділетті мемлекет. Сондықтан әр азаматтың дауысы маңызды. Біз өмір сүріп отырған қоғамның қандай болатыны, мемлекет қандай құндылықтарды басшылыққа алатыны – бәрі де халықтың еркіне байланысты. Конституция – елдің негізгі заңы ғана емес, ол қоғам мен мемлекет арасындағы ең басты келісім. Осы тұрғыдан алғанда жаңа Конституция жобасы еліміздің болашақтағы даму бағытын айқындайтын маңызды құжат болып отыр.
Біз, аудандық мүгедектер қоғамының мүшелері де, бұл маңызды оқиғадан тыс қалмаймыз. Қоғамның толыққанды мүшесі ретінде мемлекет тағдыры біз үшін де бей-жай мәселе емес. Елдегі әрбір өзгеріс, әрбір жаңашыл бастама мүмкіндігі шектеулі азаматтардың өміріне де әсер етеді. Сондықтан біз ел болашағына қатысты маңызды шешімдер қабылданатын кезде өз пікірімізді білдіруді азаматтық парызымыз деп санаймыз.
Жаңа Конституция жобасында адамның құқықтары мен қадір-қасиеті басты құндылық ретінде айқын көрсетілген. Бұл – кез келген азамат үшін маңызды қағида. Әсіресе қоғамдағы әлеуметтік қолдауды қажет ететін жандар үшін мемлекет тарапынан көрсетілетін қамқорлық пен тең мүмкіндіктердің болуы ерекше мәнге ие. Құқықтық мемлекет құру жолында әр азаматтың қадір-қасиеті мен құқығы қорғалуы тиіс. Бұл ұстаным қоғамдағы әділеттілік пен теңдіктің негізін қалыптастырады.
Мүмкіндігі шектеулі жандар үшін қоғамда тең мүмкіндік пен қолжетімді орта қалыптастыру – аса маңызды мәселе. Сондықтан біз жаңа Конституция жобасында адам құқығы мен әлеуметтік әділеттілік қағидаларының нығая түсуіне үлкен үмітпен қараймыз. Әділетті қоғам құру – барша азаматтың ортақ арманы. Мұндай қоғамда әр адам өз мүмкіндігін жүзеге асырып, қоғам өміріне белсенді қатыса алады.
Референдум – халықтың өз пікірін ашық білдіретін маңызды демократиялық құрал. Бұл күні әр азамат өз таңдауы арқылы елдің болашағына ықпал ете алады. Сондықтан қоғамның барлық өкілдері сияқты біз де бұл күнді жауапкершілікпен қабылдаймыз. Өйткені еліміздің ертеңі бүгінгі шешімдерге байланысты қалыптасады.
Аудандық мүгедектер қоғамының мүшелері 15 наурыз күні өтетін референдумға белсенді қатысып, өз таңдауын жасайды. Біз үшін бұл тек дауыс беру ғана емес, еліміздің болашағына деген жауапкершілікті сезіну. Қоғамдағы әрбір адамның дауысы маңызды екенін ұмытпауымыз керек.
Ел ертеңін айқындайтын осындай маңызды сәтте арлы азаматтар өз ұстанымын білдіреді деп сенеміз. Өйткені Қазақстан – бәріміздің ортақ үйіміз. Оның болашағы біздің бірлігімізге, саналы таңдауымызға және ортақ жауапкершілігімізге байланысты.
Алтын ЖАУАОВА, «Аудандық мүгедектер қоғамы» қоғамдық бірлестігінің төрайымы
