Референдум – бұл жай ғана дауыс беру емес. Бұл – халықтың өз тағдырына тікелей араласуы, ел болашағына қатысты шешімді өзі қабылдауы. Сондықтан референдумды халық таңдауы деу – орынды.
Қазақстан тәуелсіздік алғаннан бері маңызды саяси шешімдер бүкілхалықтық дауыс беру арқылы қабылданған кезеңдер болды. 1995 жылы Конституция референдум арқылы бекітілді. 2022 жылы да Ата заңға өзгерістер енгізу мәселесі халықтың өзіне ұсынылды. Бұл – елдегі демократиялық үрдістің нақты көрінісі.
Референдумның ерекшелігі – шешімді халықтың өзі қабылдайды. Әр азаматтың дауысы маңызды. 18 жасқа толған әр қазақстандық мемлекеттің толыққанды мүшесі ретінде өз таңдауын жасауға құқылы. Бұл – құқық қана емес, үлкен жауапкершілік.
«Бір дауыс не өзгертеді?» деген ой кейде айтылып жатады. Бірақ референдум – миллиондаған адамның таңдауы. Әрбір дауыс ортақ шешімге ықпал етеді. Ел болашағына қатысты мәселе қаралғанда бейжай қалу – өз еркіңді пайдаланбау деген сөз.
Мемлекет басшысы Қасым-Жомарт Тоқаев саяси реформалар барысында халық пікіріне сүйенудің маңызын атап өтті. Бұл – ел басқаруда азаматтардың рөлі артып келе жатқанын көрсетеді.
Референдум – халықтың үні. Ол арқылы әр адам өз көзқарасын білдіреді, елдің ертеңіне үлес қосады. Сондықтан 18-ге толған әр азамат өз таңдауын жасап, мемлекет өміріндегі маңызды шешімдерге белсенді қатысуы тиіс. Өйткені халықтың таңдауы – ел болашағы.
Сламджанова Сәуле Абылғазықызы,
аудандық Аналар кеңесінің төрайымы
