15 наурызда өтетін республикалық референдум – әрбір азамат үшін жай ғана дауыс беру күні емес, ел болашағына қатысты тарихи таңдау жасайтын маңызды сәт. Мұндай жалпыұлттық деңгейдегі шешімдер сирек қабылданады. Сондықтан бұл күнге бейжай қарамау – азаматтық жауапкершіліктің айқын көрінісі.
Референдумға барудың ең басты маңызы – халықтың тікелей билікке қатысуында. Бұл жолы шешімді белгілі бір топ немесе жекелеген құрылымдар емес, бүкіл ел болып қабылдаймыз. Әрбір дауыс – елдің ертеңі қалай болғанын қалайтынымызды білдіретін нақты ұстаным. «Менің дауысым ештеңе өзгертпейді» деген түсінік бұл жерде жүрмейді. Өйткені референдум – көптің пікірі жинақталып, бір ортақ шешімге айналатын демократиялық құрал.
Дауыс берудің тағы бір маңызды қыры – азаматтық сананың қалыптасуы мен нығаюы. Референдумға қатысу арқылы адам өзін тек бақылаушы емес, ел өміріне ықпал ететін белсенді азамат ретінде сезінеді. Бұл – қоғамдағы жауапкершілік мәдениетін арттыратын фактор. Өз таңдауын жасаған адам елде болып жатқан өзгерістерге де бейжай қарамайды, заң мен тәртіпке, қоғамдық келісімге құрметпен қарайды.
Референдумға қатысу – болашақ ұрпақ алдындағы жауапкершілік. Бүгін қабылданған шешім ертеңгі жастардың, балалардың өмір сүру сапасына, құқығы мен мүмкіндігіне әсер етеді. Біз қандай қоғамда өмір сүргіміз келеді, қандай мемлекет қалдырғымыз келеді – осының бәрі дауыс беру арқылы айқындалады. Сондықтан бұл тек бүгінгі күннің емес, ертеңнің де таңдауы.
Позитивті тұрғыдан алғанда, референдум – елдегі бірлікті күшейтетін маңызды қадам. Түрлі көзқарас, әртүрлі пікір болуы – табиғи құбылыс. Ал сол пікірлердің барлығы заңды, ашық әрі бейбіт түрде дауыс беру арқылы ортақ шешімге келуі – қоғамның кемелдігін көрсетеді. Бұл өзара түсіністік пен сенімді арттырады.
Сонымен бірге референдумға қатысу – мемлекетке деген сенімнің көрінісі. Биліктің халық пікіріне жүгінуі, шешімді елмен бірге қабылдауы – ашықтық пен әділетке ұмтылыстың белгісі. Ал халықтың белсенділігі сол сенімді ақтайды. Осындай өзара жауапкершілік қана тұрақты әрі дамыған қоғам қалыптастырады.
15 наурыздағы референдумға бару – міндет үшін емес, өз болашағың үшін жасалатын саналы қадам. Бұл – үнсіз қалмай, өз ойыңды ашық білдірудің, ел тағдырына үлес қосудың ең өркениетті жолы. Әр дауыс маңызды. Өйткені мемлекет дегеніміз – билік қана емес, ол – ең алдымен, оны құрайтын халық.
Жалғас АЛТЫНБЕКОВ,
Жетісу облыстық мәслихатының депутаты
