Елімізде қоғамдық-саяси жаңғыру үдерісі қарқынды жүріп жатыр. Соның ішінде халық пен билік арасындағы ашық диалогты нығайтуға бағытталған бастамалардың орны ерекше. Бұл ретте Ұлттық Құрылтайдың рөлі айрықша деп есептеймін. Құрылтай – ел бірлігін бекемдейтін, стратегиялық бағыттарды айқындайтын, қоғам пікірін тоғыстыратын маңызды алаң.
Мемлекет басшысы Қасым-Жомарт Тоқаев Ұлттық құрылтайдың бесінші отырысында жаңа Парламентке «Құрылтай» деген атау беру мәселесін көтеріп, оның тарихи және саяси мәніне ерекше тоқталды. Бұл – жай ғана атау ауыстыру емес, мазмұндық жаңғыруға бастайтын маңызды қадам. Себебі «Құрылтай» ұғымы – халқымыздың сан ғасырлық дәстүрінде ел тағдырын айқындайтын алқалы жиынды білдіреді.
Мен, облыстық мәслихат депутаты ретінде, осы бастаманы толық қолдаймын. Жаңа Парламентке «Құрылтай» атауын беру – халықтық сипат пен ұлттық тарихи сабақтастықты нығайтады деп санаймын. Бұл қадам заң шығарушы органның қоғам алдындағы жауапкершілігін арттырып, ел сенімін күшейтуге ықпал етеді.
Құрылтай – бұл жай ғана кеңес немесе жиын емес. Ол – халықтың үні естілетін, ел болашағына қатысты маңызды шешімдер қабылданатын кең ауқымды қоғамдық институт. Мұнда әртүрлі сала өкілдері, сарапшылар, жастар мен зиялы қауым бас қосып, өз ұсыныстарын ортаға салады. Осындай ашық пікір алмасу алаңының болуы – әділетті әрі жауапты мемлекеттің белгісі.
Бүгінгі қоғам жаңаша ойлауды, батыл шешімдерді талап етеді. Сондықтан Парламент қызметінің мазмұнын халыққа барынша жақындату – уақыт талабы. Егер заң шығарушы орган «Құрылтай» деген атаумен жұмыс істесе, ол тек заң қабылдайтын мекеме ғана емес, ел пікірін тоғыстыратын шынайы халықтық мінберге айналады. Бұл – демократиялық үрдістерді тереңдетудің нақты көрінісі болмақ.
Сонымен қатар, алдағы уақытта құрылтай форматындағы жұмыс тәсілдерін кеңінен енгізу қажет деп есептеймін. Өңірлердің мәселесін ашық талқылау, азаматтық қоғам өкілдерінің ұсыныстарын ескеру, жастардың қатысу үлесін арттыру – басты басымдықтардың бірі болуы тиіс. Әсіресе жастардың дауысы естілетін, олардың бастамалары қолдау табатын алаң қалыптастыру – болашаққа салынған инвестиция.
Қорыта айтқанда, жаңа Парламентке «Құрылтай» атауын беру – тарихи тамырымызға сүйене отырып, заманауи басқару жүйесін қалыптастыруға бағытталған маңызды шешім. Облыстық мәслихат депутаты ретінде мен бұл бастаманы қолдаймын және оның ел бірлігін нығайтып, мемлекеттік институттардың беделін арттыруға қызмет ететініне сенімдімін.
Бірлік пен жауапкершілік – табысты мемлекеттің негізі. Құрылтай атауы осы құндылықтарды айқындайтын символға айналуы тиіс.
Ризван САКИОВА,
Жетісу облыстық
мәслихатының депутаты
