Бүгін Мемлекет басшысының Үкіметтің кеңейтілген отырысында көтерген мәселелері өте өзекті. Ел дамуына бағдар болатын, кемшіліктерді жойып, олармен нақты күресудің тетіктерін көрсетіп берді.
Өз басым осы ретте Президентіміздің «Көбірек табыс әкелетін дәнді-дақылға көшуді жалғастыру қажет. Сондай-ақ шикізатты сақтау және оны терең өңдеу мүмкіндіктерін арттыру маңызды. Өнімді шетелге шығаруға қолдау көрсету керек.
Малдың жұқпалы ауруларына қатысты ахуалды, соның ішінде екпе егу мәселесін ерекше бақылауда ұстаған жөн. Мал шаруашылығының экспорттық әлеуеті осыған байланысты» дегенін қазіргі жағдайда ауылдағы дихандар мен мал шаруашылығымен айналысатын шаруалардың қуана қабылдайтынын, ендігі сәтте осы бағыттағы атқарылар шаруаларды реттеп, бір жүйеге түсіру, субсидия мәселесін заңды түрде бекіту қажет дер едім. Өз өнімдерімізді шетелге шығару ісінде де шаруаларға мемлекет көмекке келуі тиіс. Оның жарқын мысалы біз Беларусь елінен анық көріп отырмыз. Қазіргі таңда еліміздің кез-келген дүкенінде Беларусь Республикасының бір колхозында немесе совхозында өндірген тауарлар тұр. Бұл не деген сөз? Бұл деген — шағын ғана бір ауылда өндіріліп жатқан өнімнің шетелге сатылуына мемлекет мүдделі болып, оған жағдай жасап отыр деген сөз. Сондықтан да Президентіміздің өнімді шетелге шығаруға қолдау көрсету керек дегені ел экономикасына тың серпін беретін, кәсіпкерлер мен шаруаларды қолдаудың оңтайлы жолы.
Молот СОЛТАНАЕВ,
«Жаркент айнасы» газетінің Бас редакторы
