Мемлекет басшысы Қасым-Жомарт Тоқаевтың Қазақстан халқына Жолдауында: “Жаңа Қазақстан дегеніміз – егемен еліміздің болашақтағы бейнесі. Өз елінің ертеңіне сенбеген халық мықты мемлекет құра алмайды. Бұған тарихтан талай мысал келтіруге болады. Біз келешегіміз кемел боларына және жарқын болашақты өз қолымызбен жасай алатынымызға сенеміз. Әрбір азаматтың конституциялық құқығы мүлтіксіз сақталуын қамтамасыз етеміз. Мемлекет пен қоғамның өзара сеніміне және құрметіне негізделген жаңа саяси мәдениетті қалыптастырамыз” деген. Қазіргі уақытта біздің алдағы ең басты мақсаттарымыздың бірі — Қазақстанның өркендеуіне үлесімізді қосып, 19 наурыз күні өтетін ҚР Парламенті мәжілісінің және Мәслихаттарының депутаттарын сайлап, дұрыс таңдау жасауымыз қажет.
Сайлау — еліміздегі үлкен де іргелі істердің бірі. Отанымыздың гүлденіп және жаңа белестерге көтерілуіне, қарқынды дамуының бірден бір кепілі. Әрбір Қазақстандықтардың дауысы мұхитқа тамған тамшыдай қымбат.
Қазақстанның ел болып өркендеуі қазіргі болашақ жастардың қолында. Жастарымыз табанды еңбек етіп, елімізде болып жатқан онды үдерістерге белсенді ат салысуы арқылы ғана талай жетістіктерге қол жеткізе аламыз. Сонымен қатар, жастар қоғамға өз пайдасын тигізіп, алған білімдері мен тәжірибелерін еліміздің өркендеуіне жұмсайтын болса, онда Қазақстанның келешегі кемел болатыны сөзсіз.
Тарих көшіне көз жүгіртіп өтсек, талай тағдырды, қиын қыстау кезді басынан өткерген қазақ халқының шежіресі терең мән- мағынаға тұнып тұр. Көне түркі даласын мекендеп, көк түріктің жалауын желбіреткен кезден бері уақыт көшімен алға жылжып, бүгінгі күні қазақ жұрты өзінің асқақтығын айғақтаумен келеді.
Ел бірлігіне сызат түспей, халқының амандығы үшін қандай да бір батыл шешім қабылдай білетін Мемлекет басшысын – Президентіміз Қ.Тоқаевты біз әркез қолдаймыз. Оның жасампаз бастамалары мен елдің көңілінен шығатын шешімдері бізге рух беріп, қанаттандырады. «Бірлікті ел бұзылмас» дегендей, тәуелсіз Қазақ елінің тұтастығы мен тұрақтылығы осы бірліктің арқасында деп білеміз. Сондықтан барлығымыз бір бастай ат салысып, Президентіміздің әрбір ісіне қолдау көрсетіп, сайлауда өз дауысымызды беруіміз игі іс деп білемін.
Еліміз тату болып, бірлігіміз жарасқан ел болсақ, мемлекетіміз тыныш өмір сүреді. Бүгінгі күнімізді ғана ойламай, әрқашанда ертеңімізді ойлап, еліміздің ахуалын түзетуіміз керек. Жарқын болашаққа нық қадаммен жұмыс жасауға әрбіріміз үлес қосуға міндеттіміз. Президент бастамалары халық билік арасындағы сенімді арттырып, еліміздің көркендеуіне зор септігін тигізері анық.
Ең басты құндылық- халықтың бірлігі. “Жұмыла көтерген жүк жеңіл” демекші елімізді қолдаудың ең басты жолы- бірлік пен татулықты бойымызға сіңіріп, Жаңа Қазақстанның жарқын келбетін бірге құрайық.
Сіздерді 2023 жылдың 19 наурыз күні өтетін Қазақстан Республикасының Парламенті Мәжілісінің және Мәслихаттарының депутаттарын сайлап, өз дауыстарыңызды беруге шақырамын!
Алакөл ауданы әкімінің
баспасөз хатшысы А. Мұратова
