Мемлекеттің әлемдік сахнадағы салмағын арттырумен қатар бұқараның тұрмыстық әлеуетін жоғарылату – бұл билік тізгінін ұстаған азаматтардың басты міндеттерін толықтырып тұр. Осы ретте президент Қ.Тоқаев саяси басқару үрдісін, даму принциптерін өзгерту ниетінде түрлі реформаларды қолға алып, пәрменді қызмет етуіне бас-көз болуда.
Соның қатарында ҚР Парламенті Мәжілісі мен әр деңгейдегі мәслихат депутаттарының сайлауын айтуға болады. Бұндағы жаңашылдық халықтың өзіне қажетті кандидаттын таңдауы, дауыс беру арқылы депутатты сайлауы.
Саяси науқан барысында түрлі партиялар мен үміткерлер қарқынды жұмыс атқарып, қоғамның қолдауына ие болу үшін біраз жұмыстың бетін қайырды. Мың жүйріктен шын жүйріктері озып, дүбірлі аламанның басынан елдің ыстық ықыласына ие болғандар жүлделі болды.
Бұл ретте мемлекеттік басқару мен заң шығару барысында озық ойлы, пікірі пайымды, ең бастысы қалың қауымның арасынан іріктеліп шыққан тұлғалармен қызмет етудің артықшылығы мол. Мәжілістен бастап мәслихаттарда тізгін ұстағандардың қатарында осындай азаматтар көптеп кездеседі.
Ескере кететіні, аталған бастама мемлекет басшысының бастамашыл идеяларының үздік идеологияға айналып бара жатқандығының көрінісі. Әр Жолдау, саяси саладағы өзгерістер, Үкіметке жүктелген жауапты жұмыстар – барлығы да бұқараның пікірмен санасатын, елге қарқынды қызмет етуші мемлекеттік жүйені орнықтырудың алғы қадамдары болып отыр. Саяси аренада «Үлкен сілкініс» жасаған Қ.Тоқаевтың бұл өзгерістері қай-қайсымызды болмасын қуантпай қоймағаны рас. Қос қолымызды көтере қолдаған көптеген ұтымды жобаар мен жоспарлы істер баршылық. Бұның барлығы халықтың мемлекетке деген сенімін арттыру үшін жасалып жатқан қадамдары екендігі сөзсіз.
Жалпы елдегі саяси болсын, экономикалық болсын реформалар мемлекеттің дамуына, азаматтардың конституциялық құқықтарын күшейтуге, адами капиталды арттыруға, қоғамдағы белсенділіктің қалыптасуына, бұқараның әлеуметтік жағдайын жақсартуға, түптеп келгенде қазақстандықтардың жайлы өмір сүрулері үшін қолға алынуда.
Бұл ең алдымен жаһандық бәсекелестікте бәсіміздің жоғары болып, кез келген тайталаста қалыс қалмауымызға мүмкіндік беретін жолдар.
Алмат ЕСЕНБЕКОВ,
бас редактор.
