Өткен жұмада Панфилов аудандық әкімдігінің жиынжайында ҚР Сыбайлас жемқорлыққа қарсы іс-қимыл агентігінің Жетісу облысы бойынша Департаментінің басшысы Саян Қылышұлы Ахметжанов өңір активімен кездесу өткізді. Оған қала, ауылдық округ әкімдері, мекеме басшылары, қоғамдық ұйымдар мен ақпарат құралдарының өкілдері және құқық қорғау орындарының қызметкерлері қатысты.
Кездесуді Панфилов ауданының әкімі Марат Сағымбек кіріспе сөз сөйлеп ашып, басқа да аудандар сияқты Жаркент өңірі жұртшылығымен жыл сайын әртүрлі форматта жүздесуді дәстүрге айналдырған облыстық департамент басшысының бұл жолы өз саласында өткен жылы атқарған жұмыстарының есебін баяндайтынын, сонымен қатар жемқорлық фактілеріне қатысты мәселелерге байланысты қатысушылардың сауалдарына жауап беретінін айтып өтті.
Жиында ҚР Сыбайлас жемқорлыққа қарсы іс-қимыл агентігінің Жетісу облысы бойынша Департаментінің басшысы Саян Ахметжанов өткен жылы аймақта жемқорлықтың жолын кесу бағытында атқарылған жұмыстар жөнінде жан-жақты дәйекті, сарапты баяндама жасады. Баяндамада облыста өткен жылы өзара іс-қимыл мен сыбайлас жемқорлыққа апаратын тәуекелдер картасының барлық 9 саласы қамтылып, тиянақты жұмыстар жасалғанын саралады. Әсіресе әлеуметтік саладағы, оның ішінде білім беру жүйесіндегі жемқорлықтың республикада көш бастағанын баяндамашы жасырған жоқ.
– Денсаулық сақтау саласында 400 миллион теңге көлемінде 27 медицина мекемесі басшыларының заңсыз қосымша төлемақылары түріндегі бюджетке келтірген залалдарының алды алынды. Профильді басқарманың лауазымдық жалақылар мөлшерін бекіту туралы бұйрықтың күші жойылды. Денсаулық сақтау министрлігімен еңбекақыны есептеудің бірыңғай әдістемесі әзірленуде.
Білім беру саласында күмәнді аударымдар бойынша уәкілетті мемлекеттік органдармен ай сайын салыстыру жұмыстарын жүргіземіз. Республика бойынша бухгалтерлерге ЭЦҚ кілттерін заңсыз беруді шектейтін және басшылардың дербес жауапкершілігін арттырған «Favoritmobile» смартфондарға арналған қосымшасын кеңейттік. Колледждердің қызметіндегі 66 миллион теңге көлеміндегі заңсыз төлемдер қайтарылды. Лауазымдық жалақы мөлшері Үкіметтің «Азаматтық қызметшілердің еңбекақы төлеу жүйесі туралы» №1193 қаулысына сәйкес, ал үстемеақылар байқау кеңестерінің шешімдерінің негізінде анықталатындай еттік.
Әлеуметтік қорғау саласында мүмкіндіктері шектеулі 110 адамға кепілдендірілген әлеуметтік көмекті толық көлемде алу қамтамасыз етілді. Субсидияланатын жұмыс орындарын беруден бас тартқан 2 мыңнан астам жұмыс берушінің құқы қорғалды. Қос қаржыландыру және еңбек қызметін тоқтатқан адамдарға төлемдерді аудару фактілері бойынша бюджетке 4 миллион теңге қайтарылды. Еңбек және әлеуметтік қорғау департаменті басшылығы тарапынан мүгедектікті белгілеу үшін пара алу әрекетінің жолы кесілді. Тәуекелдерді болдырмау бойынша ұсыныс енгізілді.
Фискалдық салада 2024 жылдың маусым айында Қытай Халық Республикасымен шекарадағы әлеуметтік шиеленіс тікелей өткізу пункттерінде шетелдік рұқсат бланкілерін беру арқылы жойылды. Біздің ұсынысымыз бойынша, Көлік министрлігі бұл пилоттық жобаны 2024 жылдың желтоқсан айында «Е-лицензиялау» жүйесіне осы функционал қосылғанға дейін барлық өткізу пункттеріне енгізді.
Экология саласында әкімдіктердің теңгеріміне 24 иесіз сібір жарасының көмінді объектілерін қабылдау қамтамасыз етілді. Қатты тұрмыстық қалдықтар саласында барлық аудандар мен қалаларда қоқыс жинау, тасымалдау, сұрыптау және көму тарифтері бекітілді.
Табиғи ресурстарды пайдалану бағытында құм-қиыршық тас қоспасын заңсыз өндіруге қарсы іс-қимыл мәселелері бойынша бірлескен бұйрықтың қабылдануын қамтамасыз еттік. Осы актімен табиғи құм-қиыршық тас қоспасын заңсыз өндіру және бюджет қаражатын жымқыру фактілерін азайтуды байланыстырамыз. Алакөл мемлекеттік қорығы басшылығы тарапынан экологиялық заңнаманы бұзғаны үшін жүйелі парақорлықтың жолы кесілді.
«Бизнеске жол» жобасы бойынша 8 мыңнан астам бизнес субъектісінің (8614) құқықтары қорғалды. Мемлекеттік сатыпалуларға мониторинг жүргізу арқылы бір миллиярд теңгеден астам қаражат үнемделді. Бұл факті бойынша 16 адам әкімшілік жауапкершілікке тартылды.
Алдағы кезеңге қойылған міндеттермен «Заң мен тәртіп» тұжырымдамасы негізінде жұмысты күшейту айқындалды.
Сыбайлас жемқорлық тәуекелдері картасы қайта жаңғыртылуда.
Сыбайлас жемқорлықтың жүйелі фактілерін, соның ішінде жоғары лауазымды тұлғалардың қатысуымен құқық бұзушылықтарды анықтау, азаматтардың құқықтарының бұзылуына жол бермеу және келтірілген залалды өтеу бойынша шаралар қабылдау қарекеттері жалғастырылуда.
Аймақтық сыбайлас жемқорлыққа қарсы іс-қимыл басшысының баяндамасында облыста және өңірлерде орын алған жемқорлық фактілері жіліктеп жеткізілді. Әсіресе жол құрылысы, халықты ауыз сумен жабдықтау, спорт ұйымдары арасындағы, ауыл шаруашылық өндірісі саласындағы жемқорлықтың жолын кесу мәселері бойынша жұмыстар жанданғаны айқын аңғарылды. Сонымен қатар сыбайлас жемқорлықтың алдын алу шараларының әдістемелік тәжірибелік жолдары бағытындағы жұмыстар талданды.
Баяндама барысында Панфилов ауданына қатысты бірқатар мәселелер көрсетілді. Атап айтқанда аудандық ауруханада бір литр сүтті сатып алу бағасын екі есе жоғарылатқан. Жаркент су құбыры мекемесінде де тура осындай, өздеріне қажет материалды жоғары бағада сатып алу фактілері орын алған. Бұл келеңсіздіктер дер кезінде анықталып, жөнге келтіріліпті.
Мырзағали НҰРСЕЙІТ
