Жетісу облысында цифрлық трансформация «Цифрлық Қазақстан» мемлекеттік бағдарламасы аясында дамып келеді. Бағдарлама өңірді заманауи, қолайлы әрі жоғары технологиялы аймаққа айналдыруды мақсат етеді. Бүгінде аймақта тұрғындардың өмір сапасын жақсартуға және экономиканы дамытуға ықпал ететін заманауи цифрлық қалалық орта қалыптастырудың берік негіздері қалануда.
Жүзеге асырылып жатқан жобалардың қатарында – білім беру саласындағы мемлекеттік қызметтерді автоматтандыру, «109 қызметі» бірыңғай байланыс орталығын іске қосу, сондай-ақ инновациялық технологиялар мен жас мамандарды тартатын өңірлік IT-хаб құру бар. Бұл тек өзгерістердің бір бөлігі ғана – цифрлық құралдар денсаулық сақтау саласынан бастап қалалық инфрақұрылымға дейін түрлі бағыттарда енгізілуде.
Алдағы жылдары интеллектуалды көлік жүйелері, «ақылды» коммуналдық желілер, смарт-жарықтандыру және деректерді өңдеу орталықтары белсенді дамиды деп күтілуде. Мұндай технологиялар қалалық шаруашылықты басқару тиімділігін арттырып, көлікті қолайлы, ал коммуналдық қызметтерді тұрғындар үшін ашық әрі қолжетімді етеді.
Барлық цифрлық шешімдерді бірыңғай басқару платформасына біріктірудің маңызы зор. Ол әртүрлі инфрақұрылымдық нысандардың жұмысын үйлестіріп, жедел шешім қабылдауға және кез келген өзгерістерге жылдам әрекет етуге мүмкіндік береді. Бұл басқаруды икемді әрі заманауи етеді.
Энергия үнемдейтін және экологиялық таза технологияларды енгізуге ерекше көңіл бөлінуде. Мәселен, смарт-жарықтандыру жүйелері энергия тұтынуды азайтып қана қоймай, өңірдің тұрақты дамуына, экологиялық жағдайды жақсартуға және тұрғындарға жайлы орта қалыптастыруға ықпал етеді.
«Маңыздысы – көлік жүйесі тұрғындардың нақты қажеттіліктеріне сай болуы. Маршруттар ойластырылып, жолға кететін уақыт барынша қысқарса дейміз. Жаңа цифрлық шешімдердің пайда болғаны қуантады. Олар әсіресе таңертең балаларды апарып, жұмысқа үлгеру үшін көлікті ыңғайлы етсе екен», – дейді Жетісу облысының тұрғыны Айнұр Т.
Ол сондай-ақ тұрғындар қалалық өмірдің басқа да салаларында өзгерістер күтетінін атап өтті: смарт-жарықтандыру түнгі уақытта көшелерді қауіпсіз етсе, ал тұрғындарға хабарламалар жіберетін қоқыс шығару бақылау жүйесі ауладағы тазалық пен тәртіпті жақсартуға септігін тигізеді. Мұның бәрі – заманауи әрі ыңғайлы қала ортасына жасалған қадамдар. Жаңа цифрлық шешімдерді енгізуде халықпен тұрақты диалог жүргізу және олардың нақты қажеттіліктерін ескеру басты рөл атқарады.
