Жетісу облысының аумағында ауа райының құбылмалылығы мен температураның күрт өзгеруіне байланысты су айдындарындағы мұз қабаты тұрақсыз болып, адам өміріне нақты қауіп төндіруде. Төтенше жағдайлар департаментінің мәліметінше, қазіргі уақытта өңірдегі өзен-көлдерде жұқа және әркелкі мұз жамылғысының қалыптасуына байланысты қауіпті жағдай сақталып отыр. Әсіресе Алакөл, Балқаш көлдері, сондай-ақ облыстағы кішігірім су қоймалары мен өзендер ерекше бақылауға алынды.
Мамандар мұздың қалыңдығы біркелкі емес екенін, көптеген тұстарда ойықтар, жарықтар мен борпылдақ құрылымдар пайда болғанын ескертеді. Әсіресе өзен сағалары, көпір асты және қамыс өскен аумақтар өте қауіпті деп танылды. Жыл сайын дәл осы кезеңде балықшылар мен балалардың бекімеген мұз үстіне шығу фактілері жиі тіркеледі. Департамент өкілдері сырттай тығыз көрінген мұздың өзі қауіпсіздікке кепілдік бермейтінін, оның беріктігі тек қалыңдығына ғана емес, құрылымына да байланысты екенін алға тартады.
Қазіргі таңда құтқарушылар күнделікті рейдтер мен патрульдеу жұмыстарын жүргізіп, балықшылар мен тұрғындар арасында түсіндіру шараларын қолға алды. Су айдындары маңына ескерту белгілері орнатылды. Төтенше жағдайлар департаментінің өкілдері азаматтарды мұз үстіне көлікпен шықпауға, мұздың беріктігін аяқпен тексермеуге және балаларды қараусыз қалдырмауға шақырады. Қауіпті жағдай орын алса, дереу «112» нөміріне хабарласу қажет. Құтқарушылар профилактикалық жұмыстарды мұз толық ерігенше жалғастырмақ.
