Мемлекет басшысы Қасым-Жомарт Тоқаевтың Қазақстан халқына арналған Жолдауы соңғы жылдары қоғамдағы әр түрлі алыпқашпа пікірлерге жауап берген шынайы жаңару мен жаңғырудың татымды тұжырымы іспетті. Сол себепті де ел ішіндегі қалың қауым Президент пайымдарынан көкірегіне сенім мен үлкен үміт шырағын маздатты. Әркім өзіне керек мәселеге көңіл аударып, келешегіне кең жол ашылатынына нық сенген сыңайлы.
Мемлекет басшысы өз жолдауында ауылшаруашылығына қомақты қаржылай қолдау жасалғанын атап өтті. Алайда мәселенің мәні қаржымен шешілмейтініне де мемлекет басшысы ерекше тоқталды. Әр өңірдің ерекшелігіне қарай ауылшаруашылық өнімдерін терең өңдеп, дүкен сөресіне, яғни ел игілігіне ұсыну туралы ойлары бізді де ойландырып тастады. Отандық кәсіпкерлер уақыт талабына бейімделуі керек екен. Яғни аграрлық кешенде цифрландыру мен жасанды интеллектіні кеңінен қолдануды үйрену алдағы тіршілігімізге жеңілдіктер әкеледі деген үмітімізді үкілеп отыр.
Бұл Жолдау таяу болашақта саяси реформаларға және бірқатар әлеуметтік-экономикалық шаралардың оң жүзеге асуына мұрындық болмақ. Жолдаудағы маңызды басымдық – ел экономикасын арттыруға бағытталған дағдырысқа қарсы кезек күттірмейтін шараларды қабылдау. Бұл бағытты өз тіршілігімізбен сабақтастырсақ, жазиралы Жаркент өңірінде халықтың негізгі тіршілігі мал және егін шаруашылығымен тікелей байланысты. Сонымен қатар экономикаға тірек болар шағын және орта бизнес, өнеркәсіп, сауда-саттық салалары да өркен жайған. Біздің ауданда жыл сайын 44,5 мың гектарға ауылшаруашылық дақылдары егіліп, өткен жылдың өзінде ғана 175 мың тоннадан астам өнім өндірілді. Дала өндірісіндегі жетекші дақыл жүгерінің егіс көлемі 23 мың гектардан астам алқапты құрайды. Өңірде 9 мыңға жуық кәсіпкерлік субъектілер халыққа әр түрлі қызметтер көрсетіп, аудан экономикасын табыс биігіне көтеруге қызымет етіп келеді.
Жолдауда егін мен мал шаруашылығын барынша жоспарлы дамыту арқылы ішкі нарықтағы ауылшаруашылық өнімдерінің, оның ішінде халық күнделікті тұтынатын ет, сүт бағасын тұрақтандыру мәселесі атап айтылды. Біздің Қазақстан елі табиғи мүмкіндіктерін тиімді пайдаланған жағдайда, азық-түлік өнімдерінен ешкімге алақан жаймайтыны анық. Жолдаудан қолдау тапқан халық осы мүмкіндіктерге жететініне сенемін.
Тасқын ЖАПАРҚҰЛ,
Ауыл шаруашылық өндірісінің ардагері, кәсіпкер
