Жетісу облысы Төтенше жағдайлар департаментінің Панфилов ауданы Төтенше жағдайлар бөліміне Республикалық жедел-құтқару жасағы тарапынан жаңа арнайы техника табысталды. Құтқарушылардың материалдық-техникалық базасын нығайтуға бағытталған бұл қолдау төтенше жағдайлардың алдын алу және олардың салдарын жою жұмыстарын тиімді жүргізуге мүмкіндік береді.
Жаңадан берілген техникалардың қатарында жол талғамайтын арнайы автокөлік пен көп мақсаттағы амфибиялық қайық бар. Аталған қайықтың басты ерекшелігі – суда да, құрлықта да қозғала алатындығы. Бұл оның су тасқыны, көл мен өзен маңындағы оқыс оқиғалар, сондай-ақ қолжетімділігі қиын аумақтардағы құтқару жұмыстарында кеңінен пайдаланылуына жол ашады.
Соңғы жылдары төтенше жағдайлар қызметінің материалдық-техникалық базасын жаңарту жұмыстары кезең-кезеңімен жүргізіліп келеді. Өрт сөндіру және авариялық-құтқару бөлімшелері заманауи құрал-жабдықтармен, арнайы техникамен және қажетті жабдықтармен қамтамасыз етілуде. Мұның барлығы төтенше жағдайларға жедел әрекет ету сапасын арттыруға бағытталған.
Осыған орай аудан әкімінің орынбасары Төлеухан Керімбеков Панфилов аудандық Төтенше жағдайлар бөлімінің қызметімен танысып, техникалық жағдайын көрді. Ол мекеменің көлік тұрақтарын, құтқару жұмыстарына қажетті құрал-жабдықтарын және материалдық ресурстарын сақтау орындарын аралады.
Сонымен қатар Жаркент қаласындағы №11 өрт сөндіру бөлімінде де жаңғырту жұмыстары жүргізілуде. Бүгінде бөлімнің демалыс бөлмелері мен кезекші өрт сөндірушілерге арналған жатын орындары жөнделіп, қызметкерлердің жұмыс жағдайын жақсартуға баса көңіл бөлінуде.
Қазіргі уақытта Панфилов ауданындағы төтенше жағдайлар қызметінің қарамағында 5 негізгі және 1 арнайы мақсаттағы техника бар. Жаңадан берілген екі қосымша техника бөлімшенің мүмкіндігін арттырып, құтқарушылардың кез келген жағдайда жедел әрекет етуіне жағдай жасайды.
Мамандардың айтуынша, арнайы техникалардың жаңартылуы тұрғындардың қауіпсіздігін қамтамасыз етуге және табиғи немесе техногендік сипаттағы төтенше жағдайлар кезінде адам өмірін сақтап қалуға бағытталған маңызды қадамдардың бірі болып табылады.
