Республикалық референдум күні Панфилов ауданының орталығы Жаркент қаласында жастардың белсенділігі ерекше көзге түсті. Таңертеңнен бастап дауыс беру учаскелеріне келген жас азаматтардың қарасы көп болып, олар ел болашағына қатысты маңызды саяси науқаннан шет қалмайтынын көрсетті.
Жас буын өкілдері өз таңдауларын жасау арқылы қоғамдағы өзгерістерге бейжай қарамайтынын айқын аңғартты. Олардың пікірінше, референдум – тек дауыс беру ғана емес, әр азаматтың мемлекет дамуына қатысты өз ұстанымын білдіретін маңызды мүмкіндік. Бұл туралы бүгін БАҚ арқылы Астанадағы дауыс беру учаскелерін аралаған Өзбекстан ОСК төрағасы Зайниддин Низамходжаев та мәлімдеген болатын. Ол референдум комиссиясының мүшелері мен қоғамдық бақылаушылардың арасында жастардың көп болғаны қуантатынын, бұл азаматтық жауапкершілікті байқататынын жеткізген еді
Көптеген жастар дауыс беру учаскелеріне достарымен, оқу орындарының қатарластарымен немесе еңбек ұжымдарымен бірге келіп, азаматтық жауапкершіліктің үлгісін көрсетті. Әсіресе алғаш рет дауыс берген жас сайлаушылар үшін бұл күн ерекше әсерлі болды. Олар өздерінің конституциялық құқықтарын пайдаланып, ел өміріндегі маңызды шешімге қатысудың маңызын атап өтті.
Сарапшылардың пікірінше, жастардың мұндай белсенділігі қоғамдағы саяси мәдениеттің қалыптасып келе жатқанын көрсетеді. Себебі мемлекет дамуының ертеңі – бүгінгі жас буынның көзқарасы мен жауапкершілігіне тікелей байланысты.
Жаркенттік жастардың референдумға белсенді қатысуы олардың ел тағдырына бейжай қарамайтынын, болашаққа қатысты мәселелерге жауапкершілікпен қарайтынын тағы бір мәрте дәлелдеді. Бұл өз кезегінде қоғамдағы азаматтық сананың өсіп келе жатқанын айқын көрсетеді.
Мырзағали НҰРСЕЙІТ,
Қазақстанның Құрметті журналисті
