2026 жылғы 1 қаңтардан бастап Қазақстанда жаңа Салық кодексі өз күшіне енді. Осыған байланысты жеке тұлғалардың көлік құралдарына салынатын салықты есептеу тәртібіне айтарлықтай өзгерістер мен жеңілдіктер енгізілді.
Ең басты жаңалық — жеңіл автокөліктердің пайдалану мерзіміне байланысты төмендету коэффициенттерінің енгізілуі. Енді көлік неғұрлым ескі болса, салық соғұрлым аз болады:
• Пайдалану мерзімі 10 жылдан 20 жылға дейінгі автокөліктер үшін 0,7 коэффициенті қолданылады;
• 20 жылдан асқан көліктер үшін 0,5 коэффициенті қолданылады.
Салық жүктемесін азайту мақсатында басқа да өзгерістер қарастырылған. Мысалы, шаруа қожалықтары бұрынғы жеңілдіктерге қоса, енді тағы бір «пикап» үлгісіндегі автокөлік үшін салықтан босатылады. Мүгедектігі бар адамдар, соғыс ардагерлері, «Алтын алқа» және «Күміс алқа» және тағы да басқа санат иелері бір көлік құралы бойынша салықтан босату құқығын сақтап қалды.
Жетісу облысы бойынша 2025 жылы 130 288 жеке тұлғаға жалпы сомасы 4,2 млрд теңге салық есептелді. Ескертеміз: 2025 жылғы көлік салығын 2026 жылдың 1 сәуірінен кешіктірмей төлеу қажет. Төлем мерзімі өткен жағдайда салық органдарының ақпараттық жүйелері күн сайын өсімпұл (пеня) есептейтін болады.
Салық төлеушілер салық сомасын тұрғылықты жері бойынша өз бетінше есептеп, бюджетке аударуы тиіс. Егер автокөлік иелікте бір жылдан аз уақыт болса, салық нақты иелік еткен айлардың санына пропорционалды түрде есептеледі.
