Шығыстың қос шынарының бірі – Мәншүк Мәметованың туғанына биыл 100 жыл. Батыр қыздың есімін ұлықтап, ерлігін насихаттау мақсатында «Қаһармандықтың үлгісі» атты еске алу кеші өтті.
Аталмыш шара «Диана» жоғары медициналық колледжінің акт залында жүзеге асты. Кешті Ақерке Аязбаева мен Ұлжан Рахымғалиева жүргізді. Шара барысында батыр қыздың ерлігі туралы айтылып, колледж студенттері арнау өлеңдер оқыды. Данара Серікбай, Әсем Рүстемовалар әуезді ән шырқаса, Жанель Жасұланқызы қазақтың ұлттық аспабымен «Көңіл толқыны» күйін орындады.
Шара барысында Мерей Сауытқазы есімді студент Мәншүк Мәметованың анасына жазған хатын оқыды. Көпшіліктің жүрегіне әсерлі жеткізіп, көзіне жас ұялатты. Коледж қызметкері Қайырбекова Әсел Тұрғанбекқызы өз кезегінде сөз алып, қаһарман қыздың батылдығын студенттерге үлгі етті. Осындай шараның кең көлемде жиі ұйымдастырылып, жастарға насихаттау жұмыстарын белсене бірігіп жүргізуді ұсынды. Ал, Әйгерім Салидолда «Әлия-Мәншүк» әнін орындап, еске алу кешін қорытындылады.
Ақниет ТҰРҒАНОВА
