Қазақстан Республикасы Конституциясының 13-бабына сәйкес әрбір азаматтың білікті заң көмегін алуға құқығы бар. Сонымен бірге басты заңымыздың 16-бабында: «Ұсталған, тұтқындалған, қылмыс жасады деп айып тағылған әрбір адам сол ұсталған, тұтқындалған немесе айып тағылған кезден бастап адвокаттың (қорғаушының) көмегін пайдалануға құқылы», ал «Адвокаттық қызмет туралы» заңның 31-бабында: адвокат азаматтардың құқығы мен бостандығын сот алдында қорғап қана қоймай, тараптардың мәселені татуласу арқылы шешілуіне әрекет етуі керектігі көрсетілген.
Адвокаттардың адам құқықтары мен бостандығын қорғаудағы айрыққа еңбегін орынды бағалай білген мемлекет басшысы 2021 жылғы 25 ақпанда өткен Ұлттық қоғамдық сенім кеңесінің V отырысында: «Құқықтық мемлекет құру тәуелсіз және білікті адвокаттарсыз мүмкін емес. Мемлекеттік аппараттың жұмысы, тәуелсіз, кәсіби заңгерлердің азаматтар мен заңды тұлғаларды қорғаудың нәтижесінде өз жемісін беретіні хақ және олардың көмегімен кәсіпкерлер мен инвесторлар өз қызметтерін жандандыруға ұмтылатыны сөзсіз. Сондықтан біздің елімізде адвокатураның ролі жоғары болуы шарт» деп атап көрсеткенін Президентіміздің тарапынан адвокаттарға білдірілген зор сенім деп есептеймін.
Панфилов ауданында жоғары білімді, кәсіби біліктілігі мен жауапкершілік сезімдері жоғары адвокаттар қылмыстық, азаматтық және әкімшілік істер бойынша процестерге белсенді түрде қатысып, соттың заңды және әділетті шешім қабылдауына өз құзыреттері шегінде ықпал етумен бірге азаматтарға ауызша немесе жазбаша түрде кеңестер беріп, меншік түріне қарамастан түрлі мекемелер мен ұйымдарға азаматтардың атынан арыздар жолдауға қолдарынан келген бар көмегін аямауда.
2023 жылы 3 шілдеде Астана қаласында өткен форумда мемлекетімізде адвокатураның қызметін одан әрі дамытуға арналған арнайы бағдарлама қабылданып, 5 желтоқсан күнін «Адвокаттар күні» кәсіби мереке күні ретінде белгілеу ұсынылып, биыл елімізде аталған мереке осымен екінші мәрте аталып өтуде.
Жетісу облыстық адвокаттар алқасының төрайымы Дәнипа Әділбекова адвокатураның азаматтардың құқығы мен бостандығын қорғаудағы ролін көтеруге бағытталған ұйымдастырушылық шараларды іскерлікпен һәм жоғары кәсіби деңгейде жүзеге асыруының нәтижесінде адвокаттар ұжымының жұмысы жаңа сапалық жоғары деңгейге көтерілді. Сонымен бірге білікті басшының ұйымдастыруымен тұрақты түрде Талдықорған қаласындағы мүгедектер үйіне қайырымдылық көмегі көрсетіліп келе жатқанын бүкіл елімізге үлгі десек болады.
Ләззат СӘРСЕБЕКОВА,
адвокат
